Amapholisa eHarare ngoLwesibili abophe umhleli wephephandaba leStandard uMnu Nevanji Madanhire lentathelizindaba uNqaba Matshazi besetheswa icala lokungcolisa igama lomcebisi weReserve Bank of Zimbabwe uMnu Munyaradzi Kereke lokuntshontsha imfihlo yenkampani yakhe.
UMatshazi ulobe udaba oluphume kuStandard mhlaka 6 kuyonale inyanga, obelusithi inkampani kaKereke, iGreen Card Medical Society, ilakho ukubhidlika ngoba ibhekane lobunzima bemali.
UMnu Kereke uthi loludaba lumhlambazile emphakathini njalo uthi amaphepha asetshenziswe nguMatshazi ekululobeni antshontshwe enkampanini yakhe.
Amapholisa angene emahofisini eleliphephandaba ngoLwesihlani ebuzisisa ukuba uMatshazi wayewathole ngaphi amaphepha ayelemfihlo yenkampani kaKereke.
UMatshazi loMadanhire balele esitokisini njalo bazamiswa emthethwandaba ngoLwesithathu.
Umqondisi weAlpha Media Holdings, yona edinda iphephendaba leStandard uMnu Raphael Khumalo usole kakhulu ukubotshwa kwababili laba esithi kuveza sobala ukuha uhulumende uqhubekela phambili ngokuhlukuluza intathelizindaba.
