Amapholisa athi umhleli wephephandaba leNewsDay, uMnu. Wisdom Mudzungairi, lothapha izindaba, uMnu. Richard Chidza, bathuke umongameli ngemva kokuloba udaba obelulesihloko esiphathelane lempilakahle kamongameli.
Lokhu kwethulwe liphephandaba leli mhlaka 2 ngoMbimbitho lapho elikubeke khona ukuthi uMongameli Robert Mugabe engabe ebulawa ngumkhuhlane wemvukuzane.
Ababili laba kanye lommeli we Alpha Media Holdings, uNkosokazi Sifikile Thabethe, banikwezwe ezandleni zegqwetha labo, uMnumzana Obey Shava.
Ukubotshwa kwabo kusolwe kakhulu yinhlanganiso yentathelizindaba eye Media Institute of Southern Africa lezinye ezifanayo.
Umqondisi weMISA Zimbabwe, uMnu. Nhlanhla Ngwenya, kubi kakhulu okwenziwe ngamapholisa.
Lokhu kugcizelelwe nguMnu. Foster Dongozi, umqondisi wenhlanganiso yentathelizindaba eye Zimbabwe Union of Journalists, othe kuyethusa ukubotshwa kwentathelizindaba lezi.
Ukhuthaze ukuba kumele abaphathintambo bakahulumende baphendule ngemfanelo nxa bebuzwa ngokutshiyeneyo nguhulumende okugoqela ukugula kuka Mugabe.
Umqondisi wenhlanganiso ezimeleyo eye Growthedge Development Programme ( GDP ), uMnu. Zisunko Ndlovu, uthe kungeke kwalungiswa okuhlupha iZimbabwe nxa kubotshwa intathelizindaba.
UNdlovu uthe ngabe umongameli usebenzisa izibhedlela zaphakathi kwelizwe ngabe azikho lezi ezivela kuzulu ohlezi ekhonona ngokuphuma kokuphela kukamongameli elizweni elobhekise kwamanye amazwe lapho ayelatshwa khona umkhuhlane wamehlo.
Isikhulumeli sewofisi kaMugabe, uMnu. George Charamba, utshele amaphephandaba kahulumende ukuba uMugabe uyehlolwa impilakahle yakhe kwele Singapore njengalokho ahlezi ekwenza.
