amalinks wokungena

Breaking News

Kubotshwa Umphathintambo, UMnu. Jameson Timba Esetheswa Icala Lokweyisa Umongameli


Umphathintambo wezenzakala emahofisini enhloko kahulumende, uMnu.Morgan Tsvangirai, uMnu. Jameson Timba, ubotshiwe ngamapholisa eHarare ngolweSihlanu. Embikweni owethulwe yiMDC ekhokhelwa nguMnu Tsvangirai uTimba wetheswa icala lokweyisa uMongameli Mugabe. Lokhu kwenzakala ibandla leli lisithi unobhala obona ngokuqoqwa kwenhlelo zebandla leli umzini weKambuzuma, uMnu.Tendai Chiminya uthunjiwe ngabantu abanakanelwa ukuthi ngabakubutho.

Isikhulumeli salelibandla uMnumzana Douglas Mwonzora utshele iStudio Seven ukuba ukuthunjwa kuka Chiminya yikwenza kwabakubutho abazama ukwethusela amalunga kanye lenkokheli ye bandla lakhe. U Mwonzora uthi lokhu kwenza kwabakubutho sekuphazamisa isivumelwano sokubunjwa kukahulumende womanyano.

U Mwonzora utshele i Studio 7 njalo ukuba u Chiminya uthethwe ngamadoda abehlomile bamphosela emoteni okusobala ukuba bekungasi mapholisa ngoba kuze kube manje amapholisa akakatsho lutho phezu kokuthunjwa kwake lokuba wetheswa cala bani.


UTimba yena ubotshelwe imbiko ayethule ngeviki edluleyo esithi uMongameli Mugabe utshela abantu amanga ngempumela yomhlangano weSADC owenzelwa kwele South Africa kumaviki amabili adluleyo.Ibandla leMDC lithi okumangalisayo yikuthi amapholisa amelele oLwesihlanu ukuthi bambophe ngoba befuna ukuthi alale esitokisini okwempelaviki yonke.

Kunjalo nje, kuyasetshelwa ukuthi inhloko kahulumende, uMnu. Morgan Tsvangirai laye engabotshwa. Lokhu kulandela imbiko efana leka Timba emayelana lempumela yomhlangano weSADC. Isiphathamandla sebandla leZanu PF, uMnu. Jonathan Moyo ekuqaleni kwayonale iviki, uthe kumele uTsvangirai abotshwe ngoba laye weyise uMongameli Mugabe aze tshele umhlangano werally eGweru ukuthi uMongameli Mugabe waqambele uzulu amanga ngokuphume emhlanganweni weSADC.

Umsekeli wesikhulumeli seMDC-T, uNkosazana Thabitha Khumalo utshele iStudio 7 ukuthi ibandla leZanu PF likhanya selivuke ubhova kulandela ukwehluleka kwalo ukuthi kwenziwe ukhetho wonalo umnyaka.

XS
SM
MD
LG