Isicelo lesi siqondiswe enhlanganisweni ezehlukeneyo ezisebenzisana lozulu, siza ele Zimbabwe lisanda kumanyana lamazwe womhlaba, ukunanza usuku oluqakathekisa abadinga ukuphephela kwamanye amazwe olwe World Refugee Day, luka mhla ka 20 Nhlangula minyaka yonke.
Iziphathamandla zeZimbabwe zithi, sezedlula inkulungwane eziyisithupha iziphepheli ezibalekela elizweni zivela eMozambique, ezihlala kubo Chipinge, Nyanga lekwezinye iziqinti esigabeni seManicaland.”
Umphathintambo emahofisini omsekeli kamongameli, uMnumzana Emmerson Munangagwa uMnumzana Clifford Cameroon Sibanda, nguye oze emele umsekeli kamongameli, obengumhlonitshwa kulomkhosi, owenzelwe eRainbow Towers, eHarare.
“Kuthethwe lelinyathelo, ukuze kunakekelwe iziphepheli esizisanda, ikakhulu ezibalekela ukungahlaliseki okuse Mozambique,” kusho uSibanda.
Ummeli wenhlanganiso ebona ngezokulondolozwa kweziphepheli, eye United Nations High Commissioner for Refugees elizweni – UNHCR Zimbabwe, umnumzana Robert Tibagwa, uncome eleZimbabwe ngokuqhubeka lisemukela abaza ukuzaphephela elizweni lokuzadinga indawo zokuhlala, ikakhului ngalesi sikhathi kulokuqansa kwababalekela kuleli bevelela kwele Mozambique.
