amalinks wokungena

Kudutshulwa Abantu beZimbabwe eHillbrow Theater Kwele South Africa

  • Bennedict Nhlapho

Bathukuthele kakhulu abeZimbabwe kwele South Africa ngesenzo soweZimbabwe ongene eHilbrow Theatre eJohannesburg ebigcwele abeZimbabwe egigini lomculo weRhumba, wafafaza ngenhlamvu kwafa oweZimbabwe oyedwa kwalimala abafika isikhombisa ngempelaviki.

Kube yisenzo esihlasimulisa umzimba kulabo abebeseHilbrow Theatre ngesikhathi kusenzakala linhlekelele kusanda kutshaya ihola lakuqala NgeNsonto ekuseni.

Kubikwa ngalesisikhathi iHilbrow Theatre ibisigcwele phamu abeZimbabwe abebejabulele kakhulu umculo weRhumba obuqhunswa ngabaculi abatshiyeneyo. Kungalinde muntu, owesilisa obebukele kubikwa eqele esidulini sabaculi wamemezela ukuthi uzalivala igigi nxa umakhalekhukhwini wakhe osetshontshiwe engabonakalanga.

Leyinto ecasule ixuku ebelibukele laklabalala lisithi akasuke phambili. Ngokuphazima kweso owesilisalo ukhiphe uvolovolo wafafaza ixuku leli ngenhlamvu okomlimi ehasa amabele.

Ngemva kwalokho wehle egijima esidulini eqhubeka ehasa inhlamvu indawo yonke waze wayaphuma emnyango wabaleka. Kuthe esephumile ixuku labantu seliphuma liminyezelana emnyango kwatholakala ukuthi oyedwa udutshulwe wahle wafa kwathi abafika isikhombisa balimala.

Abalimeleyo bathwalelwe esibhedlela kanti izihlobo bezingakalethuli igama likamuyi.

Inengi lababone lokhu kusenzakala basethukile okokuthi bayesaba lokulandisa loludaba. UMcasiseli Gwazagwaza omunye wabaqoqa amagigi abaculi uthi bathukuthele kakhulu ngalesi senzo.

“Lento isiphathe kabuhlungu kakhulu ngoba iyasethusa. Eish! angazi ukuthi ngingakubeka kanjani. Kunzima lokhu okusehleleyo. Kuzobanzima ukuthi siqhubeke siyephambili uma engabe udlame lungena kanje emculweni. Lungena kuze kufike esimeni sokuthi umuntu adubule umuntu. Sizizwa singaphephanga kakhulu.”

Leyintukuthelo egcizelelwa ngumgcinisihlalo weZimbabwe Community in South Africa uMnumnzana Nqabutho Mabhena.

“Okokuqala sithanda ukudlulisa ukudabuka kwethu kumuli eyalowo odutshuliweyo wafa nge weekend lapho okade kusenzakala khona umdlalo wabaculi njalo futhi sithi labo abasesibhedlela okuthiwa kumbe bafika 7 balulame. Kulihlazo kakhulu lokho okwenzakeleyo. Kuyasiyalula njengezizalwane zaseZimbabwe ezikhonalapha eHilbrow.”

UMcasiseli uthi lesi senzo sizabangela ukuthi abalandeli bengaphindi futhi baze emagigini abaculi ababathandayo, ngakho asivezwe emphakathini lesi sigangi.

“Asingamfihlini. Kungabi lomuntu omcatshisayo. Kathathwe lumuntu alethwe azakale umhlaba wonke ukuthi nguye. Ongabe futhi enaso isithombe sakhe asisatshalaliswe sibonakale aziwe wonke umuntu ombonayo emgwaqweni akwazi ukuthi nangu umuntu owenze le inhlekelele yaseHilbrow Theatre. Sibuhlungu kakhulu ngale into eyenzakeleyo.”

UMnumnzana Mabhena uthi abantu bengavumi ukwenqatshelwa yizigangi ekusekeleni abaculi kodwa bazibike emapholiseni zonke lezi ziganga ezidala amacala kweleSouth Africa ziyebolela ejele.

“Wonke umuntu oyisigangi kumele abotshwe avalelwe ngoba akumelanga sivikele futhi abantu abagangayo. Mhlawumbe iphutha esilenzayo kumbe esihlala silenza yikuthi siyabazi abantu abayizigangi, siyabazi abantu ababalemali kodwa bengasebenzi kodwa sibabona bethengutshwala, sibabona bethenga ukudla bebhadala irent sikutshaye indiva khonalokho.”

Kusenjalo besekulembiko ethi lesi sigangi sesibanjiwe ngamanye amapholisa abevele esidinga ngelinye icala elehlukene lokubulala lokhu akwenzileyo.

Osekusele eHilbrow Theatre, ligazi, imbobo zenhlamvu, amaphetshana, amagabha abonamunede lezithulo eziveza usizi lokwenzakeleyo.

Facebook Forum

XS
SM
MD
LG