amalinks wokungena

Breaking News

Kudutshulwa Abantu eMarange eManicaland


Kubikwa kufe abantu ababili kwalimala abambalwa ngemva kokudutshulwa ngabalinda endaweni ezilemigodi yamatshe aligugu amadayimana awenkmapni kahlumende eye Zimbabwe Consolidated Diamond Company koMarange esabelweni seManicaland.

Lokhu kwenzakale ngoLwesibili olwedluleyo, abantu aba besetheswa umlandu wokwemba amadayimana okungekho emthethweni.

Kodwa omunye wabadutshulwa balimala uNkosikazi Linda Mlambo, uthi yena labanye bakhe abadutshulwe balimala kulesi sehlakalo, bebengelani lokwenjiwa kwamadayimana njengoba bebeseguswini elingekho phansi kwenkampani ye ZCDC, bezithezela inkuni.

UNkosikazi Mlambo oleminyaka engamatshumi amathathu lanhlanu, elabantwana abane, uthi abalindi laba baphonguqala ukubadubula bengabazisanga ukuthi badale cala bani, wazibona esewele phansi etshaywe luhlamvu lombhobho.

Utshele umsakazo weStudio 7 uNkosikazi Mlambo, ukuthi yena uvele engasiso sakhamuzi seMarange kodwa ubethekelele udadewabo owendele khona. Ekhuluma esesibhedlela seMutare General lapho agijinyiselwe khona uthe odokothela abacine bemhlola bafumana elohlamvu esiswini bahle bamhlinza.

Kodwa isikhulumeli senkampani eye Zimbabwe Consolidated diamond company, uMnu. Sugar Chagonda, utshele iStudio 7 ukuthi ngolwazi alutholileyo kubikwa kufe umuntu oyedwa hatshi ababili njengokuphuma ezindabeni.

Abakade besemba amadayimana okungekho uthi baqale ukulwisana labalindi laba bezama ukubabonisa ukuthi abakwenzayo akukho emthethweni kodwa babona sebekhulelwa okubenze bacina sebesebenzisa imibhobho ukuzivikela.

Facebook Forum

XS
SM
MD
LG