amalinks wokungena

Kubhubha Isizalwane seZimbabwe Esitshaywe Ngamapholisa eBotswana

  • Martin Ngwenya

IMap yeBotswana, Africa.

Esinye sesizalwane zeZimbabwe ezabalakela ejele eBotswana ufele esibhedlela seFrancistown ngemva kokukhala ngenhlungu lamanxeba okutshaywa okwesihluku ngamapholisa ngesikhathi sokubotshwa okwesibili ukuthi zibuyele ejele ngemva kokubaleka.

UMnu. Charlotte Ndlovu ubhubhele esibhedlela seNyangabgwe ngoLwesine oludluleyo ekhonona ngokutshaywa kabuhlungu ngamapholisa lapho emthola, ngemva kokubaleka ejele eseFrancistown ngenyanga edluleyo.

UNdlovu, kanye labanye abalitshumi lanye lasikhombisa, baphunyuka lapho ababengcinwe khona eFrancistown Centre For Illegal Immigrants.

Kodwa yena labanye abayisikhombisa, babanjwa bamiswa phambi komthethwandaba. UNdlovu ubikwa etshele umantshi ukuthi bahlukuluzwe kakhulu ngamapholisa besithi bayesaba ngitsho lokubuyela ejele.

Kodwa umantshi wathi izikhalazo zabo zizakhangelisiswa noma nje kungasathathanga isikhathi uNdlovu engalaliswanga esibhedlela wasebhubha.

Isikhulumi samapholisa, umnunzana Edward Leposo uthi uNdlovu ubhubhe ngemva kokuhanjiswa esibhedlela kulandela ukubotshwa kwakhe. ULeposo uthi abangeke bakhulume ngokuthi uNdlovu ubulewe yini, belinde umbiko kadokela, ipostmortem.

UNdlovu uzabekwa eZimbabwe ngoba ekade engakatholakali elecala aletheswayo lokubulala. Ngabe UNdlovu ube esegwetshiwe, kade ezabekwa eBotswana kulandelwa umthetho wokulahlwa kwabapika emajele.

Kodwa iZimbabwe ilakho ukwala ukwamukela isidumbu sikaNdlovu uma ingasuthiseki ngencazelo yokufa kwakhe, umbono obanjwe ngomunye oweZimbabwe uMnu. Charles Banda.

"Sesike sabona ngaphambilini iZimbabwe isala ukwamukela labo ecabanga ukuthi abaphathwanga kahle eBotswana, ngakho silakho ukubona okufanayo ngendaba le."

UBanda uthi izehlakalo zolimala kumbe ukufa kwabeZimbabwe ezandleni zabomthetho eBotswana ziyanda njalo zikhathaza.

"Okuqakathekileyo yikuthi amaze womabili emhlanganweni yabo eye joint security, kumele akhulume ngendaba ezifana lalezi."

Amapholisa eBotswana alokhe esemzileni abanye ababaleka ejele, kucatshangelwa ukuthi bachapha umngcele baphindela eZimbabwe. Abanye beZimbabwe babanjwe ekhaya, amazwe womabili esesebenza indlela zokubaphindisela eBotswana ukuze bazoqhubeka bepikela amacala abo.

Facebook Forum

XS
SM
MD
LG