amalinks wokungena

Breaking News

Amakhomishina Amatsha aweZACC Afungiswa Ukuqala Umsebenzi


Unkosazana Jessie Majome ngomunye wamakhomishina amatsha afungiswe ngoMvulo

Amalunga ayisitshiyagalombili awekhomishini ebona ngezenkohlakalo eyeZimbabwe Anti-Corruption Commission (ZACC) afungiswe ukuqala umsebenzi namhlanje. Okhomishina laba bafungiswe ukuqala umsebenzi nguMongameli Emmerson Mnangagwa esigodlweni sakhe ese State House.

Okhomishina beZACC abafungiswe NgoMvulo baqoqela uJohn Makamure, Frank Muchengwa, Micheal Santu, Kuzia Murapa, Thandiwe Mlobane, Mabel Hungwe kanye lababili abake baba ngamalunga ebandla eliphikisayo ele MDC, umnumzana Gabriel Chaibva lo Nkosazana Jessie Majome.

Abekhomishini le bakhangelelwe ukuhlolisisa zonke indaba zobusela emahofisini aphezulu kanye lezenkohlakalo nxa bengathola ubufakazi obupheleleyo babuse kwabomthetho babotshwe abayabe besephula umthetho.

Lokhu kuza ngemva kokuba indaba zobusela lenkohlakalo emahofisini aphezulu sezivamile elizweni.

Unkosikazi Thandiwe Mlobane ongomunye wamakhomishina aqale umsebenzi namhlanje uthe ukhangelele ukuthi baphande impande zobusela endaweni zonke zempilo.

“Uzulu simthembisa ukuthi lokhu okwenzakalayo ukuthi abantu bandla imali enengikakhulu, ngobusela obenziwayo okwenza ukuthi ilizwe lingaze laphumelela so thina sikhangelele ukuthi sisebenze ukuthi lapho okulempande yakhona sihle siyiqume,”

Uqhubeke ethi ikhomihini le entsha izabitshiyene leyakudala ethembisa ukuthi abasoze beyamele cele ekusebenzeni kwabo.

“Thina siletha okutshiyeneyo ngoba sikhangelele ukuthi akula muntu esizakuthi lo akumelanga athintwe lo unjani hayi, kodwa nxa esenza okuphambane lomthetho sizabona ukuthi lokho akwenzakali. Sizaphinda njalo sivule indleba silale wonke amahungahunga siwalandelele kunjalo sikhangele ukuthi kuyini okwenze kube lomkhohloakalo onjalo ngoba ukukhohlakala lokhu kudla imali enengi”

Ekhuluma lentathelizindaba ngemva kwalo umkhosi, umgcinisihlalo weZACC uJustice Loyce Matanda-Moyo uthi kunje kulendaba ezedlula amakhulu amabili(200) zenkohlakalo lobusela emahofisini aphezulu amele ukuhlolisiswa.

“Okwakhathesi sisaqhuba imihloliso yendaba esilazo. Silodaba luka Attorney General’s Audit Report, udaba lwempumela yogwalo lwe NSSA, silendaba njalo eye Hwange, kulendaba yeCommand Agriculture kanye lezinye ezinengi esilazo okwakhathesi

Kodwa abanye bathi kuzamele iZACC itshengise ukungeyameli cele ekuqhubeni umsebenzi wayo njengokwethembisa kwayo ukuze uzulu abelethemba kiyo.

Lokhu kuza ngemva kokuba kube lendaba ezinengi ezaveze ubusela kodwa kuze kube namhlanje akukabi loyedwa obotshiweyo. Kumaviki adluleyo, intsha yebandla le ZANU PF iveze amabizo alabo abacatshangelwa ukuthi bantshontsha imali kumankampani kanye lakuhulumende abaqoqela iziphathamandla zebandla lelo.

Kodwa iskhulumeli somkhokheli webandla eliphikisayo eleMDC uMnu. Nkululeko Sibanda uthe akalathemba lokuthi amakhomishina eZACC azakwenelisa ukuqhuba umsebenzi ngokubalulekileyo.

“Lokhu kutsho kuthi nxa iskhulu enkamba engela kuthembekala ukuthi usebenza njani kunzima ukuthi besesithemba amapholisa akhe, udubo esilalo ngolokuthi loumpholisa oweZACC ulodubo lokuthi asikwazi ukuthi yena engabe emi kanjani nxa sikhangele ukuthgi kulodaba lwama 15 Billion lendaba zokuthi kubolekwa indizamtshina zivela eDubai, konke khonokho yiCorruption ephezulu kakhulu. Akufanelanga ukuthi kwenziwe njalo kudlalisa imali yelizwe. Ngibona angani kwenza kube nzima ukuthi sethembe ikhomishini enje”

Eminyakeni iZACC ibikwa ibingenzi umsebenzi wayo ngokupheleleyo ngoba ibingelawo amandla okubopha labo abatholelwe ubufakazi bokuthi bephule umthetho. Kodwa ngenyanga edluleyo idale lephalamende lethule umthetho omutsha ozanikeza likhomishini amandla wokubopha laloba ngubani ingathola ubufakazi obukhomba ukuthi wephule umthetho. Lokhu kukhangelelwe ukunceda likhomishini ukuthi yenelise ukuqhuba umsebenzi wayo ingela kwethuselwa.

please wait

No media source currently available

0:00 0:04:50 0:00

Facebook Forum

XS
SM
MD
LG