Abathathu abeZimbabwe abatholakale belecala lokungenisa ngundlu abantwana kanye labesifazana eBotswana besiya kweleSouth Africa, bagwetshelwe ukutshaywa ngemvubu emhlane kasikhombisa njalo bahlawuliswa amapula ayinkulungwane ezilitshumi (P10,000).
UMnu. Sudden Sibanda, Mhlangabezwa Nhliziyo loMthokozisi Ndlovu batholakale belecala lokungenisa abantu elizweni okungekho emthethweni.
Umthethwandaba kaMantshi edoloheni leFrancistown, kweleBotswana njengesijeziso, uthi kumele behlawule amapula azinkulungwane ezilitshumi - P10,000 kanye lokutshaywa ngemvubu emhlane kasikhombisa.
Kodwa uma besehluleka ukuhlawula iP10,000 kungakadluli amalanga ayisikhombisa, bazavalelwa ejele okweminyaka emobili.
Abathathu laba babanjwe ngamapholisa bengenisa abantu abalitshumi lanhlanu edolobheni leFrancistown mhlaka 7 Mpalakazi nyakenye, bethwele abantwana abalitshumi lanye, okugoqela ingane elenyanga ezintathu, labesifazane abane.
Bebuzwa emthethwandaba ukuthi kungani bedale leli cala bona bathi bebethunywe ngabazali babantwana ukuthi babalethe eSouth Africa, kodwa bengelancwadi zokuhambisa, ezamaphasiphothi.
Umthethwandaba wabakhuza usithi bafaka impilo, ikakhulu zengane, engozini ngokuchapha umngcele endaweni ezingavunyelwayo.
Omunye weZimbabwe, uMnu. Dumi Ncube uthi noma nje umthethwandaba usithi lelicala yi "human trafficking" ngesingisi, kujwayelekile ukuthi abasebenza emazweni angomakhelwane afana leSouth Africa leBotswana bacele omalayitsha ukuthi babuye lengane zabo.
"Abantu abaseGoli yibo abazama ukuthi bathathe abantwana ngabo malayitsha abacina bebanjwa sekukhanya angathi kade bezama ukuyenza elinye icala."
Abathathu laba kade becele umthethwandaba ukuthi ubazwele ungabahambisi ejele ngoba benakakela izimuli, njalo bebanjwa yibunzima bomumo womnotho eZimbabwe ukuthi bangene kubhizimusi yokuhambisa abantu eGoli.
