Annahstacia Ndlovu
Amalunga ebandla leMthwakazi Republic Party (MRP) abotshwe ngeNsonto embuthanweni womthandazo ongenwe nguMongameli Emmerson Mnangagwa akhululwe ngoMvulo ntambama lidale likamantshi wakoBulawayo eTredgold Magistrates’ Court.
Abakhululiweyo ngoMnu. Brighton Ithuthung Sibanda umngciningcebo weMRP, uThembisani Mfulongashi Mpofu, Malwande Nyathi, Khethani Nxebalendoda Ndlovu, Nkosilathi Ncube, Marshal Sibanda, Petros Mkhize, loSehliselo Ndebele.
Ababotshiweyo laba batshaywe kabuhlungu libutho phambi kukazulu enkozweni basiwa enkambeni yebutho ekoBulawayo eyeBrady Barracks lapho ababikwa betshaywe bahlukuluzwa kabuhlungu bengajahanjiswa enkambeni yamapholisa eCentral Police Station lapho abasuke sebesiyalinda ukumiswa phambi kukamantshi emthethwandaba.
Amabhakane akade bewaphethe abelotshwe okunengi okugoqela okunjengokuthi ‘Asifuni Bumbulu Thina; ‘We are the Coachroaches That Survived Your DDT’; ‘Ayala Amathambo Abakithi Owababulalayo eBhalagwe’ lokunye okwehlukeneyo.
Izibotshwa lezi zihanjiswe esibhedlela seUnited Bulawayo Hospitals emadabukakusa ngoMvulo lapho abafike bahlolwa kodwa kabayelwatshwanga ngemfaneli.
Bathe bekhululwa bathathwa nguNkosikazi Jenny Williams wabasa eGallen House ukuthi bayekwelatshwa.
Amanqgwetha enhlanganiso yeAbammeli Lawyers for Human Rights abalisa uMnu. Maqhawe Mpofu, uMnu. Blessing Dube loMnu. Dumisani Dube benelise ukulwela ukukhululwa kwabo.
UDube uthe abantu laba batholakale ukuthi kabonanga lutho ngokutshengisela eZimbabwe International Trade Fair lapho uMnangagwa owayekhonza khona leziphathamandla zikahulumende kanye alabalandeli beFamily of God Church ekhokhelwa nguMfundisi Andrew Wutaunashe.
Uthi abantu laba bebelelungelo lokutshengisela njalo sebeqalile ukulungisa amaphepha ukuba babotshiswe labo ababatshayayo kanye lomkhulu wamapholisa eCentral Police Station owapha ibutho imota ukuba ise izibotshwa enkambeni yamasotsha.
UNdodana Moyo, osakhulayo webandla leZAPU, usole kakhulu ukubotshwa lokuhlukuluzwa kwalaba bantu.
UNkosikazi Jenny Williams laye ugcizelele kulokho okukhulunywe nguMoyo esithi ukubotshwa kwabo akukho emthethweni.
UMnu Nketha Dlamini Mangoye, unobhala jikelele webandla leAlliance for National Salvation ekhokhelwa nguMoses Mzila-Ndlovu, laye usisolile lesi senzo.
Abantu abadlula amakhulu amahlanu abasuka emabandleni ehlukeneyo, abezokholo lenhlanganiso ezizimeleyo batshengisele eTredgold Magistrates’ Courts, besola ukubotshwa kwamalunga eMRP besithi uhulumende obusayo kehlukananga lokaMnu. Robert Mugabe owasuswa esikhundleni nguMongameli Emmerson Mnangagwa encediswa libutho leZimbabwe.
Bakhuthaze uMongameli Mnangagwa ukuba akhuze isisebenzi zakhe, ikakhulu ibutho ngoba selikhahlameza uzulu.