amalinks wokungena

Breaking News

Kulakho Ukuba Lodlakela Olwesabekayo Elizweni - Tsvangirai


Inhloko kahulumende uMnu Morgan Tsvangirai sexwayise ukuba eleZimbabwe lilakho ukubuyela kusimo sodlakela oluke lwabakhona ngomnyaka ka2008 nxa iSadc ingaphuza ukungenela kuqedwe ukufuthelana osokukhona kuhulumende womanyano.

Ekufikeni kwakhe elizweni evela kwele Botswana, uMnu Tsvangirai utshele intathelizindaba ukuthi kuhambo alugqibe ngoLwesihlanu utshele inkokheli yamazwe athi iZambia, Mozambique, Swaziland leBotswana ukuthi iSadc kumele ithathe amanyathelo phezu kodaba lodlakela kanye lokubotshwa mahlayana kwabasekeli beMDC.

Uveze njalo ukuthi uzahlangana loMongameli Jacob Zuma wakweleSouth Africa ngeSonto, yena ongumlamulankunzi kudaba lweZimbabwe, emazisa ngodaba lodlakela lolu lengxaki ezikhona kuhulumende.

ISadc yona izaqhuba umhlangano weTroika mhlaka 31 kulinyanga kweleZambia ihlafuna udaba lweZimbabwe, njalo ngeviki ezayo uMnu Zuma uzathumela iqula lakhe eHarare ukuyakhulumisana labeZanu PF labeMDC ngokufuthelana okukhona.

UMnu Tsvangirai usole amapholisa labebutho esithi benza santando, njalo kukhanya sebeyibo abaphethe intambo zombuso, hatshi uhulumende womanyano.

Wengeze wathi ukuze ilizwe lingabuyeli kusimo sika2008, iSadc, iAfrican Union kanye lenhlanganiso zomhlaba ezibalulekisa ukuthula kumele zingenele. Kodwa ingcwethi ecubungula ezombusazwe uMnu Mlamuli Nkomo uthi kulutshwana iSadc engakwenza.

XS
SM
MD
LG