amalinks wokungena

Uzulu weZimbabwe Unanza iPhasika Ekhala Ngokusilela Kwemali


Izakhamizi zakoBulawayo zinanza ikhefu lePhasika.

Ikhefu lePhasika liqale ngoLwesine ntambama njalo lizalandelana lelokuthola uzibuse ngoLwesibili ngeviki ezayo mhlaka 18.

Abantu abanengi bahlaba umkhosi besithi bayakukhefu elide kangaka bengela mali.

Ibhanga elikhulu lesizwe ele Reserve Bank of Zimbabwe lalo seliyehlise imali ethathwa emavinkilini ngesikhathi abantu bethenga impahla etshiyeneyo.

Umuntu usevunyelwa ukuthatha amatshumi amabili amadola - $20 - kuphela ngelanga esebenzisa imali yebulenjini.

UMnu. Nkululeko Tshuma loNkosikazi Nomqele Nkiwane bathi uhulumende kabanakekele ngoba balambile njengoba imali ivalelwe emabhanga.

Bathi imali yohlobo lwama bond notes kayisatholakali eZimbabwe njengoba kukhanya isibanjwe ngabatshintsha imali kwele Botswana.

Inengi labantu sebelala endwendweni zamabhanga lemavinkilini akoPick N Pay ayiwo apha imali kulandela ukusilela kwemali elizweni ngenxa yokumamanzonzo kwezomnotho.

Inengi labantu aliyanga emakhaya ukuyananza ikhefu lePhasika kulandela ukuswelakala kwemali emabhanga.

UBulawayo ukhangelele ukunanza ilanga likazibuse enkundleni yeWhite City Stadium ngeviki ezayo lapho umphathintambo olawula uBulawayo, uNkosikazi Eunice Nomthandazo Sandi Moyo, akhangelelwe ukukhokheli lumkhosi emele uMongameli Robert Mugabe.

Facebook Forum

XS
SM
MD
LG