amalinks wokungena

Breaking News

Kunengi Okwenzakale Kwezemidlalo Nyakenye


Okwenzakale kwezemidlalo ngomnyaka ka2017 ...

Kunengi okwenzakale kwezemidlalo nyakenye njalo intathelizindaba zemidlalo zithi bekuxubene izehlakalo ezinhle lezimbi.

Umdlalo wenguqu uqhubekele phambili kuyiwo olandelwa ngabanengi kwele Zimbabwe bona abasele bebambe owangaphansi ngemva kokuba umongameli wenhlanganiso ye Zimbabwe Football Association uPhilip Chiyangwa ethole izikhundla kunhlanganiso ye COSAFA lakunhlanganiso ye CAF.

UMnu. Phillip Chiyangwa
UMnu. Phillip Chiyangwa

Loba ephakame sakudlala ebukhokhelini bomdlalo wenguqu kuzwekazi lase Africa uChiyangwa udanise abanengi ngezinqumo abezithatha ezimayelana lomdlalo wenguqu kwele Zimbabawe abagoqela intathelizindaba uThandiwe Moyo.

“Umnyaka ka 2017 ubugcwele izinto ezinhle lezimbi, bekukunengi kodwa esingakuqamba khathesi liqembu lomdlalo we rugby (sevens) eliphumelele ukuyadlala kumidlalo yezizwe zomhlaba. Bekukunengi okubi okwenzakale kumdlalo we rugby kodwa lokho kwesulwe yikuphumelela kwaleliqembu. Okunye okuhle yikwenza kuka Methembe Ndlovu ophe ithuba abasakhulayo ukuba labo bedlale kusigaba saphezulu ese Premier Soccer League. Abafana laba inengi labo bebeleminyaka engaphansi kwelitshumi lathoba minwe mbili.

“Okukodwa okungangiphathanga kuhle yikwenza kukamongameli wenhlanganiso ye Zifa uPhilip Chiyangwa owazama ukwesula isijeziso esasiphiwe umdlali weqembu le Dynamos uChristian Epoupa owayetshengiswe ikhasi lombala obomvu.”

Iqembu elimela ilizwe emdlalweni we rugby eyohlobo lwedlalwa ngabadlali abayisikhombisa liphumelele ukuyadlala kumncintiswano wezizwe zomhlaba ozaqhutshelwa elizweni lase Melika lonyaka.

Iqembu elimela ilizwe emdlalweni wenguqu elema Warriors liphatheke kumidlalo yokudinga intshantshu zezwekazi lase Africa eqhutshelwe elizweni lase Gabon njalo ukungaphumeleli kwalo kudale ukuba obengumqeqetshi walo uKallisto Pasuwa alahlekelwe ngumsebenzi lesosikhundla saphathwa ngabaqeqetshi abagoqela uNorman Mapeza, uSunday Chidzambwa kanye lo Wilson Mutekede.

Iqembu leWarriors lazama ukudlala kahle ngo2017.
Iqembu leWarriors lazama ukudlala kahle ngo2017.

Umnyaka uthe ususiyaphela inhlanganiso ye Zifa isiphe lumsebenzi uChidzambwa yena okhokhele leliqembu laphakamisa inkezo ye Cosafa ikanti uMapeza laye uqeqetshe leliqembu labhaxabula ele Liberia nge 3 ka nya kumncintiswano we Afcon qualifiers.

UChidzambwa uphiwe umlandu wokukhokhela iqembu lama Warriors kumncintiswano we Chan iqembu leli lahle laphanga lakhutshwa ngele Namibia.

UMapeza yena ukhokhele iqembu le FC Platinum ukuba libe ngelakuqala elingaphandle kwamadolobho amakhulu ele Harare lako Bulawayo ukuphakamisa isicoco se Premier Soccer League.

“Kuqembu elama Warriors uzathola ukuba uNorman Mapeza okunguye oqalise leqembu leli ngesikhathi liqala umkhankaso walo wokudinga intshantshu zezwekazi lase Africa ubeqalise kuhle kakhulu ngokutshaya iqembu le Liberia nge 3 ka nya kodwa kusuka kumangalise ukuba lumsebenzi wokuqeqetsha iqembu lezizwe usuke waphiwa uSunday Chidzambwa.”

FC Platinum
FC Platinum

Kucele labesifazane iqembu elimela ilizwe liqede likundawo yesibili emncintiswaneni we COSAFA oqhutshelwe edolobheni lako Bulawayo njalo umgadli walo uRutendo Makore ucine ethathwa liqembu lase Spain ngemva kokutshaya amagoli amanengi.

Kweminye imidlalo iqembu elimela ilizwe emdlalweni kakhilikithi kalizange licace ukuba liyisimo bani njengoba ekuqaleni komnyaka lidanise abalandeli ngokunqotshwa lisekhaya liqembu le Afghanistan kodwa lasuka lapho layanqoba Sri Lanka khonale eSri Lanka phakathi laphakathi komnyaka kwathi ekupheleni komnyaka libhaxabulwe kabuhlungu ngele South Africa.

Emdlalweni wenqindi uCharles Manyuchi udanise abalandeli bakhe ngemva kokutshaywa ngumdlali wase Uzbekistan uQuadratillo Abduqaxorov njalo okudanise abantu yikuba ubedlala engathi akazimiselanga.

UCharles Manyuchi
UCharles Manyuchi

UManyuchi umenejwa ngabantu bakwele Zambia njengoba kuleli ebengalutholi usekelo olwaneleyo njalo intathelizindaba uNash Mkokwayarira uthi ukungatholi usekelo lwemali yikho okuphazamisa ingqubela phambili yezemidlalo kwele Zimbabwe.

“Into engathi ikhathaza kakhulu lusekelo lwemali imidlalo yethu yebo kweminye siyakhula kodwa into engibona iyinkinga kakhulu yikuba asila izinto ezeneleyo ezokuba senelise ukuba abantwabethu bethuthuke. Engikufisayo yikuba kube lezikolo ezingafundisa abantwana imidlalo etshiyeneyo.”

Idolobho lako Bulawayo like laqoqa imidlalo yokubhukutsha eye CANA Zone VI kwathi ekupheleni komnyaka idolobho leli liqoqe imidlalo ye Zone VI Volleyball Club Championships lapho okunqobe khona iqembu le Support Unit kanye leqembu le Harare City.

Udaba Esilethulelwe NguJoseph Njanji
please wait

No media source currently available

0:00 0:04:30 0:00

Facebook Forum

XS
SM
MD
LG