Uzulu weZimbabwe uveza insolo ngokwanda kwezehlakalo zokuthunjwa kwabantu elizweni lokungalandelwa kwemithetho lapho umuntu ethe wadala icala.
Inengi labantu likhuthaza ukubunjwa kwequla labantu abasebenza bezimele bakwamanye amazwe ukuzoqhuba uphenyo lokudingisisa ukuba ngubani oqondisa lesi siga sokuthunjwa kwabantu mahlayana.
Linkuthazo iza ngemva kokuthunjwa kwenkokheli yabasakhulayo beMDC ekhokhelwa nguMnu. Nelson Chamisa abagoqela ummeli weHarare West edale lephalamende u Nkosazana Joanna Mamombe, abathunjwe bakhahlanyezwa ngabacatshangelwa ukuthi ngabadlelana lokulumende weZimbabwe.
Kwenzakala njalo sikhathi sinye kuphuma imibiko yokuhlukunyezwa kwaboMaMpofu, uNtombizodwa lo Nokuthula base Cowdry Park, koBulawayo besetheswa umlandu wokwephula iziqondiso zelockdown.
Kuvele njalo imibiko yokuhlukunyezwa kwesiphathamandla senhlanganiso yababalisi eye Amalgamated Rural Teachers Union of Zimbabwe – ARTUZ uNkosikazi Moreblessing Nyambara okhokhela uhlangothi olubona ngezokulinganiswa kwamathuba phakathi kwabesifazane labesilisa lenhlalakahle yamalunga alenhlanganiso - National Secretary for Gender and Welfare.
Unkosikazi Nyambara ubikwa etshaywe ngabakubutho abekade begqoke impahla yomsebenzi kanye labekade begqoke amasudu esetheswa umlandu wokutshotshozela uzulu ukuvukela uhulumende ku video yakhe ayenzileyo ukutshengisela ukukhathazeka kwakhe losekelo lwabathathu abathunjiweyo bahlukuluzwa abeMDC.
Umnumzana Masimba Manyanya wase Goromonzi ophatheke emikhankasweni yokulwela ilungelo loluntu njalo eyingcwethi kwezomnotho, uthi le yimpi ephakathi kwabalutshwana abasuthayo labayanga.
“Inengi lalabo abakubutho lalabo abasesipholiseni kungabayanga njalo bezwelana lozulu njalo kabawelelani lalokho okwenzakala elizweni khona manje. Laba bantu abasetshenziswa ukuthumba abanye ngibona kungabantu abaseduze labehofisi kamongameli kanye leZanu Pf. Kuliqembu lababulali leli njalo iqiniso yikuthi sesililizwe lezigebengu elisebenzisana lohlangothi oluthize olutshoyo ukuthi kuyini okumele kwenziwe ukuhlukumeza uzulu. ”
Ingcwethi ecubungula inhlakalakahle yabantu umnumzana Rejoice Ngwenya uthi okwenzakalayo elizweni kuveza ukungazimiseli kukahulumende ukuhlonipha imithetho yokulondoloza ilungelo loluntu ekhuthaza ukubekwa kwemithetho enqebela ukuthunjwa kwabantu ngendaba eziqondane lezombusazwe.
“ I SADC le AU balayo imithetho yakhona, ama Protocol. Ngibona engathi mina i Parliament yethu ikakhulu laba abahlala ku Parliament abaphikisana lohulumende kabachasise babone ukuthi imithetho evimbela ukuthunjwa kwabantu iyaqiniswa. Amapholisa kasebenze esebenzela umuntu wonke. Imithelo ebhadalwayo leyi kayibhadalwa ngabantu beZanu Pf kuphela. Ama budget amapholisa imali zakhona ziphuma kubazalwane bonke beZimbabwe. Imithetho evimbela ukuthunjwa kayiqiniswe amapholisa kafundiswe ukuthi bananze impilo yomuntu wonke ikakhulu laba abantu abaphikisayo ngoba labo balelungelo elokuthi baphikise. ”
Umphathintambo wendaba zasekhaya, umnumzana Kazembe Kazembe uthembise ukuba luzakwenziwa uphenyo lokudingisisa ukuthunjwa lokuhlukunyezwa kwamalunga amathathu awe MDC la.
“Akekho ongaphezu komthetho, sizoluphenya loludaba. Nxa kungavela ukuba kwenzakala lokhu kuthunjwa kwalaba bantu sizomdinga lozo owakwenzayo. Lokho sikuthembisa kuzulu wonke weZimbabwe ukuba amapholisa azokwenza konke okusemandleni abo ukukuveza lokho okwenzakalayo. ”
Kodwa uzulu uthi uzoyicela isivuthiwe ngoba zikhona ezinye izehlakalo elokhe kungaziwa ukuthi kuyini okwenzakala kulabo abathunjwayo okubalisa owayekhankasela umbuso uqobo ekhokhela inhlanganiso ye Occupy Africa Unity Square u Itayi Dzamara, olokhe engaziwa lapho akhona lokuthi usaphila na loba hatshi lanxa amapholisa athembisa ngaleso sikhathi ukuba ayezokwenza konke okusemandleni abo ukuluphenya lolodaba.
Kodwa lalamuhla uzulu engakaziswa ukuthi kuyini okwenzakala kuDzamara isimihlanu iminyaka selokhu wanyamalalayo.
Inhlanganiso yomanyano wenhlanganiso ezilwela ilungelo labesifazane eye Women’s Coalition of Zimbabwe – WCOZ basole kakhulu lesi siga sokuthunjwa kwabesifazane beMDC.
Abe Zimbabwe Human Right Commission – ZHRC labo baveze ukukhathazeka kwabo ngalesi sehlakalo besithi lokhu yikwephula isigaba 49 sesisekelo sombuso. Engcwadini abayithumele abezindaba bathi sebeqalile uphenyo lokudingisisa okwenzakalayo lokuba ngobani abakuqondisayo.