Inhlanganiso ezizimeleyo sezisole ibandla leZanu PF ngokuqala udlakela esigabeni seBikita West ngaphambilini kokhetho lweby-election.
Udlakela lolu luqhamuke ngoLwesibili lapho abasekeli beZanu PF abatshaye khona oncintisa emela ibandla leNatoional Constitutional Assembly, uMnu Madock Chivasa, lelunga lomkhankaso wakhe uMnu. Thomas Mudzamiri, yena obikwa elaliswe esibhedlela.
Inhlanganiso ezibalisa iZimbabwe Peace Project (ZPP) leZimbabwe Election Support Network (ZESN) zithi ngenxa yodlakela lolu, sokulokufuthelana okukhulu eBikita West.
“IZimbabwe Peace Project ikhathazekile kakhulu ndodlakela lweBikita West. Abantu bayethuselwa ngabasekeli beZanu PF njalo abanye bathengwa ngokudla.”
Inhlanganiso le ithi abatshaye uChivasa loMudzamiri ngabasekeli bebandla leZanu PF ababuye ngebhasi bevela eMarondera.
Olwela amalungelo oluntu uMnu. Charles Nyoni utshele umsakazo weStudio 7 ukuthi lihlazo elikhulu elenziwa yiZanu PF.
Wengeze wathi udlakela lolu lukhomba ukuthi ukhetho luka2018 lalo luzaba lodlakela olwesabisayo.
