amalinks wokungena

Kuqhamuka Udlakela eSouth Africa Lokukhahlanyezwa Abantu Bokuza

  • Bennedict Nhlapho

Ezinye izizalwane zeSouth Africa kade zizonde zigan'unwabu ngabantu bokuza besithi batshaphaza abantwana babo njalo babathathela imisebenzi.

Ukutshengisela okuqoqwe yizizalwane zelokitshini le Mamelodi le Attridgeville ePretoria kweleSouth Africa, ezifuna abantu bakwamanye amazwe baphume baphele elizweni, kubelodlakela olukhulu okwenze amapholisa asebenzise intuthu ehitshayo lenhlamvu ezizwisa ubuhlungu.

AbakweleSouth Africa laba bethesa abakwamanye amazwe umlandu wokubathathela imisebenzi, ukudala amacala lokuba selizweni ngokungekho emthethweni.

Ukutshengisela kwezizalwane zakweleSouth Africa ezingafuni abakwamanye amazwe kuleli kuhle kwaqala ngodlakela ngesikhathi izakhamizi zelokitshi le Attridgeville zivala izitalada ngamatshe lokutshisa amathaya. Lezizakhamizi bezihlasela lokwethusela njalo intathelizindaba lokubulala amafasitela ezitolo.

Abanye abebetshengisela laba bebezivale ubuso , bethwele imiqwayi lezinye izikhali kukanti abakwamanye amazwe labo bebethwele imihedla lezigodo, bethi kuhle kuqedelwane.

Inengi labeZimbabwe abahlala kula amalokitshi bahle babaleka kulezi indawo abanye batshona bezivalele endlini besesaba ukuhlaselwa. Isizalwane seZimbabwe umnumnzana Washy Mabizela uthi izihlobo zakhe ezisePretoria zilokhu zingakaphumi ezindlini kusukela izolo.

Nampa abanye akade bezonde okumangalisayo.
Nampa abanye akade bezonde okumangalisayo.

“ Kuvuke ekuseni vele sekulama noise abantu sebevale izitalada. Abasakwazi nokuphuma ama shops awazange avule ukuthi bakwazi even ukuthenga isinkwa. So ilanga lonke batshone basendlini. Lomntwana kazange aye a crèche ngendaba ye situation yakhona.”

Isizalwane sakweleNigeria umnumnzana One Mwaneri uyaphika ukuthi bona bathathela abantu imisebenzi.

“Asikwazi ukuthi uhlupho lwabo yini. Basitshayelani? Thina kasisebenzi kuhulumende siyazisebenza. Sithwala nzima ukuze siphile la eSouth Africa.”

Isizalwane sakweleSomalia umnumnzana Mohamed uthi kuyingozi ukuthi eleSouth Africa lehluleke ukuqeda lokhu kuhlaselwa kwabakwamanye amazwe.

“Uhulumende weSouth Africa kufanele azi ukuthi umhlaba ukhangela umkhuba wabantu bakhe wokuhlasela abakwamanye amazwe.”

Bekugijimiswana kwamanye amalokitshi ase dolobheni leJohannesburg.
Bekugijimiswana kwamanye amalokitshi ase dolobheni leJohannesburg.

Umkhokheli wezakhamizi ze mamelodi eziqoqe ukutshengisela lokhu umnumnzana Mokgoka Lekganyane uyaphika ukuthi ukutshngisela kwabo ngokwenzondo yabakwamanye amazwe.

“Thina kasiyikhuthazi ixenophobia. Esikufunayo yikusa insolo yethu ngabakwamanye amazwe laba kugatsha lwendaba zasekhaya, olwezemisebenzi kanye lamapholisa.”

Bekulamakhulu amapholisa kulokhu kutshengisela a banye belinde abatshengiselayo abanye bexotshanisana labebefuna ukuhlaselana labakwamanye amazwe. Kuze kwadingeka ihelicopter ukuthi iphaphe phezulu incedisana lamapholisa.

Kusenjalo, amapholisa abophe abantu abedlula ikhulu ngezehlakalo zokutshengisela lokhu lokuhlaselwa kwezizalwane zakwamanye amazwe.

Uhulumende weSouth Africa usephumele obala esola ukuhlaselwa kwabakwamanye amazwe kodwa abebetshengisela laba bebetshaya phansi ngentonga abanye besithi bazaqhubeka abakwamanye amazwe bonke baze bahambe.

Kunjalo nje, amankampani akwele South Africa athi asezayekela ukuqhatsha abavela kwamanye amazwe abangelamaphepha abavumelayo ukusebenza kulelolizwe.

Kuthi ngakwelinye icele, kulezikolo ezithiwa besetshele abazali abalabantwana abangela maphepha okuhlala okusemthethweni ukuthi bengayi esikolo.

Kodwa kubikwa izikolo ebezilobe lezincwadi ziphinde zathi bengeza abantwana abalabazali abavela kwamanye amazwe. Ukuhlaziya loludaba sixoxe lomkhokheli wenhlanganiso yezizalwane zeZimbabwe ezikwele South Africa, eye Zimbabwe Community in South Africa, uMnumzana Nqabutho Nicholas Mabhena.

Facebook Forum

XS
SM
MD
LG