Sokuqhamuke ukufuthelana phakathi kwecele leMDC elikhokhelwa nguMnu Morgan Tsvangirai lomphathintambo obona ngentuthuko yezabelo uMnu Ignatios Chombo phezu kwequla elikhethwe nguye ukuthi licubungule okwenzakalayo kukhansili yeChitungwiza.
Amalunga equla leli abikwa ehola imali esabekayo, okuyinto esolwa kakhulu yiMDC ekhokhelwa nguTsvangirai.
Okhokhela iqula leli uNkosikazi Fungai Mbetsa ubikwa ehola imali engangenkulungwane ezedlula amatshumi amabili-$26, 000 ngenyanga kuthi umsekeli wakhe lamanye amalunga aleliqula athola ingxenye yalimali.
Kodwa ekhuluma leStudio 7 uChombo ulandile ukuthi le yiyo imali eholwa ngabantu laba wathi ohola imali ephezulu uthola i$15, 000 ngenyanga. IMDC ithi lobu yibuhuquluzi njalo ifuna uChombo lequla lakhe bacutshungulwe yiAnti-Corruption Commision.
