Iqula lamabandla akuhulumende womanyano liqhube umhlangano leziphathamandla zeEuropean Union eBrussels ngoLwesine emizameni yokuvuselela ubudlelwano obadilika eminyakeni edluleyo.
Iqule leli belilamalunga athi uMnu Patrick Chinamasa oweZanu PF, uMnu Elton Mangoma oweMDC ekhokhelwa nguMnu Morgan Tsvangirai loNkosikazi Priscillar Misihairambwi-Mushonga oweMDC kaMnu Welshman Ncube.
Abathathu laba bakhulumisane leziphathamandla zeEU ezigoqela uCatherine Ashton, yena obona ngobudlelwano beEuropean Union lamanye amazwe, bacela ukuthi izijeziso ezethulelwa uMongameli Mugabe labanye bakhe zesulwe.
AbeEU baqonqosele ukuthi uhulumende kumele alwisane lokungethembeki njalo alungisise ezombusazwe ezingamanga kuhle ukuze ubudlelwano bayo leZimbabwe bube buhle.
Lanxa ubudlelwano phakathi kweEU leZimbabwe bungahambi kuhle, iEuropean Union iqhubeka incedisa uhulumende ngemali yokuqhuba inhlelo ezitshiyeneyo.
Ukuhlaziya loludaba iStudio 7 ixhume ingcwethi ecubungula ezombusazwe uMnu Nkululeko Sibanda lomqoqi wenhlelo zeBulawayo Agenda uMnu Busani Ncube bona abathi ukuze izijeziso zesulwe kumele iZanu PF ihloniphe amalungelo oluntu.
