amalinks wokungena

Kuqoqwa Umncintiswano Wenguqu koBulawayo

  • Joseph Njanji

Inhlanganiso yeThembalethu Foundation iqoqe umncintiswano lo koBulawayo.

Inhlanganiso ye Thembalethu Foundation iqoqa umncintiswano wenguqu ozangenwa ngamaqembu ayithoba minwe mbili ozaqhutshelwa edolobheni lakoBulawayo mhla zingamatshumi amabili lambili kuyonale inyanga kaMpalakazi.

Ekhuluma ekuphawulweni okusemthethweni okomncintiswano walonyaka owe Thembalethu Foundation, umqondisi wawo uMnu. Fungai Nyamutukwa-Mpfeka, uthe eminyakeni edluleyo bebesebenza lamaqembu abafana kodwa basuke bananzelela ukuba abafana bayathola usekelo olunengi yikho lonyaka bekhethe ukusebenza lamaqembu amankazana.

UNyamutukwa-Mpfeka uthe amaqembu azaphatheka kumidlalo yalonyaka azathola usekelo lwempahla ezokusebenzisa nxa edlala umdlalo wenguqu loba ezilolonga.

“IThembalethu ngumdlalo esiwuhlanganisileyo ukuthi sibuthanise abantwana abangamankazana mhlaka 22 lamhlaka 23 eRaylton Sports Club.

Amaqembu azaphutsha esendaweni ezine eziphezulu azathola amanyufomu kuthi amanye amane azaqeda esendaweni ezine ezingaphansi azathola imendulo."

Inhlanganiso ye Thembalethu Foundation ngeyinye yezinhlanganiso ezilwisa ukumemetheka kwegciwane lengculaza kuzwekazi lase Africa lisebenzisa ezemidlalo.

“Inhlelo zalo zokufundisa abasakhulayo ziqale kwele Zimbabwe ngomnyaka ka 2012 lapho elibe lemidlalo engenwe ngamaqembu abafana abaleminyaka engaphansi kwelitshumi lathoba minwe mbili eqhutshelwe edolobheni lako Bulawayo.”

Ngomnyaka ka 2014 lisebenze lezikolo ezisesigabeni se Filabusi lapho okudlale khona amaqembu abafana njalo.

Abadlali abaphatheka kulimidlalo bathola imfundiso mayelana lomkhuhlane wengculaza langokuziphatha kuhle.

Umgcinisihlalo we Bulawayo Province Women Soccer League u Thembelani Dliwayo uthe isifiso sabo ngesokuba ukusebenzisana kwabo lenhlanganiso ye Thembalethu Foundation kuhle kube yinti eyeminyaka yonke.

“Njenge province thina siyabonga abeThembalethu ngokwenelisa ukusihlanganisela imidlalo yamankazana ngoba eminyakeni edluleyo imncintiswano yamankazana ibimilutshwane.

“Silethemba lokuba lokhu kungaba yikuqala kobuhlobo obutsha phakathi kwethu leThembalethu njalo siyathokoza ukuba amaqembu azathola okuncane okuzabaphathisa ngomnyaka ozayo sekudlalwa iligi.”

Impahla zokusebenzisa nxa kudlalwa umdlalo wenguqu ezizaphiwa amaqembu inhlanganiso ye Thembalethu Foundation izithola isebenzisana lenhlanganiso ye Kits4cause yona eyiqoqa emazweni aphetsheya kolwandle.

Amaqembu akhangelelwe ukuphatheka kumidlalo yalonyaka ngagoqela adlala kusigaba se Bulawayo Province Women Soccer League abalisa ele Street Set, iCowdray Park Queens, eleHighlanders Royals, iSobukhazi, eleRailstars, eleNew Orleans kanye lele Real Stars lona elikhangelelwe ukuba lalo ngomnyaka ozayo lidlale kuligi.

XS
SM
MD
LG