amalinks wokungena

Kusokwa Amalunga Edale Edlula Amatshumi Amabili

  • Ntungamili Nkomo
  • Mavis Gama

Uhlelo lokuhlolwa igazi kwamalunga edale lephalamende ukuthi alegciwane leHIV kumbe hatshi lugqitshwe ngoLwesihlanu kulamalunga edlula ikhulu ahloliweyo njalo kulangamatshumi amabili lanye awesilisa asokiweyo.

Amalunga agqibe loluhlelo ngokufola esuka edale lephalamende esiya eUnity Square ekhokhelwa ngumlawuli wedale uMnu Lovemore Moyo lomunye wabasekeli benhloko kahulumende uNkosazana Thokozani Khupe.

Ababili laba baphumele egcekeni ngesimo sabo, bazisa uzulu ukuthi batholakale bengelalo igciwane lengculazi.

Umgcinisihlalo wenhlanganiso yeZimbabwe Parliamentarians Against HIV/Aids, eyiyo esungule uhlelo lokuhlolwa kwamalunga edale, uMnu Blessing Chebundo ngomunye otshele uzulu ukuthi utholakale emsulwa.

UChebundo, ongomunye njalo wabesilisa abasokiweyo utshele iStudio 7 ukuthi uhlelo lolu luphumelele kakhulu, wakhuthaza uzulu ukuthi alandele isibonelo esihle samalunga edale laye ayehlolwa igazi.

Ummeli weSt Marys, uMnu Marvelous khumalo ngomunye wabasokiweyo njalo uthe uyajabula kakhulu ngenyathelo alithetheyo. Ukusokwa kubikwa kusehlisa amathuba abesilisa ukuthola igciwane leHIV nxa bethe baya emacansini bengazivikelanga.

Ukuhlaziya loludaba Ntungamili oweStudio 7 uxhume umgcinisihlalo weZimbabwe Network of People Living With HIV/Aids eMatabeleland North uNnu Sipho Mahlangu yena othi lanxa esekela uhlelo lokusokwa, uhulumende kumele aqakathekise ezinye indlela zokulwisana leAids.

XS
SM
MD
LG