amalinks wokungena

Breaking News

Kusungulwa Uhlelo Lokukhanga Abatsha Ukuthi Bangasuki eZimbabwe


Uhlelo lolu lokhuthaza abasakhulayo ukuthi bahlale kwele Zimbabwe benze abakufunayo.

Ngesikhathi ezomnotho ziqhubeka zisoma kweleSouth Africa, izizalwane zeZimbabwe sezisungule umkhankaso uhlose ukukhuthaza intsha yeZimbabwe ukuthi iziphilise ngamatalenta emvelo hatshi ukugijimela kweleSouth Africa.

Lumkhankaso ozaqhuba uhlelo lwayo lwakuqala kuyonale impelaviki koBulawayo ugoqela ezemidlalo, ezemiculo, ukulingisa leminye imisebenzi yezandla eyenziwa ngabatsha.

Ukoma kwezomnotho eZimbabwe sekubangele ukuthi izinkulungwane zabatsha, kugoqela labanye abangakaqedi isikolo begijimele kweleSouth Africa bezodinga amadlelo aluhlaza. Kodwake ukoma kwezomnotho kweleSouth Africa sekubangele ukuthi inengi labatsha laba bacine sebebamba inkunzi abanye bethengisa imizimba yabo ngenxa yokusilela kwemisebenzi.

Isizalwane seZimbabwe umnumnzana Giyani Dube, uthi umkankaso wabolo, uhlose ukupha ithuba entsheni eselizweni lokuthi ihlakulele amathalenta ayo emvelo iziphilise ngawo hatshi ukuyazidingela olunye uhlupho kweleSouth Africa.

“Senzela ukuthi abantu bakhone ukuthi basebenzise amakhono abo abawanikezwa nguNkulunkulu kulokuthi babe becabanga ukuthi baphume phandle kwezwe, kwamanye amazwe bafike babe yizigebengu njalo abanye babe ngonondindwa.”

Omunye wabaqoqa loluhlelo, uMnu. Enos Mlilo, uthi ngempelaviki bazaqhuba uhlelo lwabo lwakuqala lwalo umkankaso kuyonale iSonto ezayo lapho okuzaqwaqwazana khona amaqembu ebhola labatsha ayisitshiyagalombili aphuma kuward 9 elokitshini leMpopoma.

Kunkulumo yake ayethule ngomnyaka ophelileyo, uMongameli Mugabe uke wakuthinta ukuthi inengi lentsha ikakhulu kweleMandebeleni bakhula belalowo mqondo wokuthi bazakuya kweleSouth Africa, kantike leli lizwe lalo selibhekane lobunzima kwezomnotho. Ngenyanga ephelileyo kuvele ukuthi inani labangasebenziyo kweleSouth Africa seledlule kumatshumi amabili lesikhombisa ekhulwini.

Ngakwelinye icele inengi lezizalwane zeZimbabwe ziyakufakaza ukuthi amasela amanengi emadolobheni eHilbrow, Berea le Yeoville yintsha yeZimbabwe. Kuyafakazwa ngabanengi njalo ukuthi manengi kakhulu amantombazana eZimbabwe asakhulayo asephila ngokuthengisa imizimba endaweni ezinengi ezenza lokhu kula amalokitshi.

UMnu. Dube uthi balethemba lokuthi umkankaso wabolo uzakwenza intsha elethalenta kwezemidlalo, ukucula, ukulingisa leminye imisebenzi yezandla , ihlale phansi ihlakulele amathalentala kube yiyo indlela yokuziphilisa. Uthi ikakhulu kumathalenta ezemidlalo bazavuna okukhulu ngalo umkhankaso.

“Sikhangelele ukuthi ama scouters abuya kumateam amakhulu namanye amascouters abuya kwamanye amazwe afike athole italent sikwazi ukukhiqiza oMadinda, naboPeter Ndlovu nabanye abadlali bodumo basemandulo.”

Inengi lamaqembu azabeqwaqwazana koBhanyo, eMashobaba leNyathi elokitshini leMpopoma gempelaviki alentsha enengi kakhulu esivele idlala kumincintiswano yeBulawayo Social Soccer League. Umnumnzana Mlilo uthike phansi kwale imincintiswano abayibiza WafaWafa Social Soccer Tournament usebone amathalenta amanengi azosizakala kakhulu ngalo umnkankaso wabo.

]Uthi ngaphandle kokusiza intsha ukuhlakulela amathalenta emvelo, loluhlelo lokuzilibazisa kwentsha luzasiza njalo ukubakhipha entweni ezimbi ezigoqela ukudala amacala lokusebenzisa izidakamizwa.

Facebook Forum

XS
SM
MD
LG