Abenhlanganiso yomanyano wabosomabhizimusi eye Zimbabwe National Chamber of Commerce (ZNCC), sebesungule uhlelo lokuthuthukisa osomabhizimusi besifazane olwe Women Owned Brand Campaign (WOB ), olokuphathisa ekukhankaseleni imikhambo ethengisa impahla elungiswa yibo.
Emkhosini wokuphawula loluhlelo, emawofisini eMotor Industries, eHarare, inkokheli yeZNCC, itshele intathelizindaba ukuba lokhu kuza ngemva kweminyaka emibili yokuhluzisisa phezu kwaloluhlelo.
UNkosazana Kerina Chipo Chizemo, wohlangothi lokukhulumisana kuZNCC, uthe uhlelo lolu lujonge ukuthuthukisa umnotho wabesifazane.
Njengenhlanganiso, uChizemo uthe sebakunanzelela ukuba lanxa bebanengi osomabhizimusi besifazane, balutshwana abazivezayo ngezizatho ezehlukeneyo okugoqela ukwesabela khatshana.
Bebekhona abesifazane asebekubhizimusi njalo kungasesebatsha abaze ukuzabukisa impahla yabo kulomkhosi.
Laba babalisa uNkosazana Queen Dorcas Makaya wenkampani elungisa izitsha zokudlela enjenge miganu lenkomitsho ezilungiswe ngomdaka.
UNkosazana Makaya, oqale ukuphatheka kwezokulUngiswa kwemphahla eseseyisifundi eEvelyn High School koBulawayo, uthe sekumphilisa lokho akwenzayo njalo useqhelise ibhizimusi lakhe waqalisa lokuqhatsha abantu.
Ubekhona njalo uNkosazana Doreen Valerie Chingwaru, oqhuba izifundo zobungcitshi kwezokulungiswa kwempahla zamaSciences ezeApplied Bio-Sciences and Bio-Technologies ekholitshini leMidlands State University ( MSU ). Yenake uqhuba ibhizimusi lokuchola i-flour yembambayila.
Uthe ukhangelela ukuba lizokuba libhizimusi elizothuthuka phansi kwaloluhlelo lwe WOB.
Abe ZNCC baveze njalo ukuba luzosabalala ilizwe lonke loluhelo ukwenzela ukuthuthukisa osomabhizimusi besifazane kungakhathelekile ukuba kusemaphandleni loba emadolobheni.
