Inhlanganiso ezisebenzelana labaphila lobugoga ziphatheke embukisweni wamalanga amathathu we Disability Expo owenzelwa e Africa Unity Square e Harare, bebukisa eminye yemisebenzi yabo ngasikhathi sinye bekhankasela inkokheli lozulu ukuba aphathise emisebenzini yokuthuthukiswa kwalaba bantu ngokugcweleyo.
Lumbukiso oqoqwe ngabehofisi ecebisa umongameli kundaba zobugoga elizweni, ngowesibili lokhu waqalayo nyakenye njalo ungenwe zinhlanganiso phose zonke ezisebenzelana labaphila lobugoga.
IStudio Seven ikhulumisane lezinye zalezinhlanganiso okubalisa elodumo eye Danhiko Project etholakala e Masasa e Harare.
Unkosikazi Molly Pelagia Parirehwa ongumongikazi nguye obona ngezempilakahle kulendawo ye Danhiko u Health Co-odinator uveze ukuba imibukiso yaloluhlobo iphathisa ekuthini kube lokuzwisisa kanye lobudlelwano phakathi kwabaphila lobugoga lalabo abangela bugoga. Uthi ukuphatheka kule imibukiso sekulethe imibono emitsha kuzulu lanxa ekhala ngokuthi inengi lokhe lingakazi kangako phezu kwayo.
Unkosikazi Esther Magenga ozalelwe e Gokwe uphila lobugoga njalo useleminyaka engamatshumi amabili lambili esebenza khona eDanhiko ngemva kokuba etholiswe imfundiso yemisebenzi yezandla okweminyaka emithathu kusukela ngomnyaka ka 1988. Uthi kunje abagogekileyo laba bephatheke kumisebenzi eminengi okubalisa ukuthunga impahla ethi basebenza bemanyene labenkampani ye Bata njengoba bethunga labo izicathulo
Umnumzana Ticha Muzavazi,ofundisa abaphila lobugoga esikolo se St Giles e Harare ikakhulu kundaba zezomculo, ngomunye wabaqoqe lumbukiso ekhangele indaba zokuzilibazisa. Ukhuthaza uzulu ukuba aluzwisise udaba lobugoga kungakhathalekile ukuba yena uphila labo loba hatshi.
Wengeze ethi uzulu kumele azi ukuba uphatheke ngendlela ezehlukeneyo ekusebenzeleni labaphila lobugoga ngakho kuqakathekile ukuba wonke umuntu aphatheke ngokugcweleyo ukubathuthukisa njengalokho okutshiwo luhlelo lweZIMASET.
Lokhu kugcizelelwe ngumnumzana Reuben Wichi yena ophatha umsebenzi wokuguqulela ingwalo kulimi oluzwisiswa yilabo abangaboniyo olwe brail enhlanganisweni ye Dorothy Duncan. Akaboni umnumzana Wichi oleminyaka engamatshumi amabili lasitshiyagalombili uthi lokhu sekungokwesibili selokhu lumbukiso wasungulwayo nyakenye awuchaze njengombukiso ophathisa ukumanyanisa uzulu lenhlanganiso ezisebenza labaphila lobugoga.
Lumbukiso ungenwe njalo zinhlanganiso ezivele ngaphandle kwe Harare okubalisa eye Kukura Ishungu Institute okuyinhlanganiso eyasungulwa ngomnyaka ka 1984 e Marondera ngenjongo yokuphathisana labazali kakhulukazi abesifazane abalabantwana abaphila lobugoga obehlukeneyo okufana lonkosazana Rebecca Tavengwa ongaphilanga kuhle emzimbeni.
Ukhuthaza abazali ukuba bangaze babavalela ezindlini abantwababo abalobugoga ngoba kuyikubancindezela. Lokhu kugcizelelwe ngumnuzana Loyd Jaravaza osebenza ngokuzinikela kungela mbadalo wobuvoluntiya kulenhlanganiso ethi ngoba kuphathisa abaphila lobugoga indawo lapho bahlangana khona beveza ubuciko labo njengaye wonke umuntu.
UJaravaza uthi uzulu laye usevuleke inqondo ukuba abaphila lobugoga laba labo kungabantu abanelisa ukuphatheka kumisebenzi eyehlukeneyo.
Ukhala ngosizo kuzulu labamankampani,lwemitshina yokulungisa leyo mpahla abayilungisayo okufana lemitshina yokulungisa amaputi leyokuthunga athi kuzaphathisa ukuthuthukisa abaphila lobugoga laba.
Unkosikazi Tabeth Sibanda onguyena Supretendant kulenhlanganiso ye Kukura Ishungu Institute owaqala engumbalisi uthi ukusebenzelana lalaba bantu abaphila lobugoga kumvulke ingqondo wazwisisa ukuba bangabantu labo njengaye wonke umuntu elizweni. Ukhuthaza uzulu unkosikazi Sibanda ukuba ukungena emphakathini bebafundisa phezu kokuqakatheka kokuphatheka kwakhe wonke umuntu kungakhathalekile ukuba uyisima kanjani kuphathisa ekuthini luphele udubo lokukhethwa kwalabo abaphila lobugoga esigabeni seMarondera lapho inhlanganiso yakhe ikhona.
Uphela ngolweSihlanu lumbukiso njalo ubikwa uzavhulwa okusemthethweni ngoLwesihlanu. Ugxile kakhulu kundaba zokuthuthukiswa kwalabo abaphila lobugoga.