amalinks wokungena

Breaking News

Kusungulwa Umdlalo weBaseball 5


Zimbabwe U18 Baseball Squad.

Abenhlanganiso yomdlalo owebaseball , eye Zimbabwe Baseball Association bathi sebelenhlelo zokusungula uhlobo lomdlalo lo, odlalwa ngabadlali abahlanu owaziwa ngegama elithiwa Baseball 5.

Lokhu kuza ngemva kokuba izithukuthuku zamajaha aleminyaka engaphansi kwelitshumi lathoba minwe mbili amela ilizwe le Zimbabwe emdlalweni we baseball ziphelele emoyeni ngemva kokumiswa kwezemidlalo sekuqhamuke umkhuhlane we Covid 19.

Iqembu leli bekumele liyephatheka kumncintiswano wamaqembu amela izabelo ezitshiyeneyo elizweni le South Africa ngenyanga kaMbimbitho kodwa alisenelisanga ngemva kokumiswa kwezemidlalo phose kuwo wonke amazwe asemhlabeni.

Umqeqetshi weqembu leli uShepherd Sibanda uthi lumncintiswano ubuzakupha ithuba abadlali abasakhulayo ukuba bezwane amandla labadlali bezinga laphezulu.

“Nyakenye iqembu lesizwe like laphatheka kumncintiswano wokudiga amaqembu azakuyadlala kumidlalo ye Olympics yikho besikubone kufanele ukuba leqembu labasakhulayo lalo like liphume liyedlala phandle kwelizwe.

Emavikini asanda kwedlula sithole umbiko othi lumncintiswano usuzakuba khona ngomnyaka ozayo ngenyanga kaMabasa. Lokhu lathi kusipha ithuba elokuba sibumbe iqembu eliqinileyo kusiya fika umnyaka ozayo,” kutsho uSibanda.

USibanda uthi balenhlelo ezokuba abadlali bomdlalo we baseball baqhubeke belokhu bedlala lumdlalo okuzinhlelo ezilakho ukwenza lumdlalo ukhule udlalwe ngabadlali abanengi.

“Njengoba kulezinsuku kungavunyelwa ukuba abantu bebuthane ngobunengi silomncabango owokuba siqalise ukudlala umdlalo we Baseball 5 wona ongumdlalo we baseball ofinqiweyo njalo ochazayo kakhulu.

Nxa uzulu engawuthakazelela umdlalo we Baseball 5 kungenzakala ukuba kube labantu abanengi abangatholakala sebelothando lokudlala imidlalo ye baseball kanye le softball,” kutsho uSibanda.

Umdlalo we Baseball 5 usungulwe ngomnyaka ka 2017 emazweni aphetsheya kolwandle njalo udlalwa ngabadlali abahlanu ababalisa abesilisa abathathu kanye labesifazane ababili.

Inkokheli zomdlalo we baseball elizweni zithi zikubone kufanele ukuba abadlali lozulu nje jikelele babe bezilibazisa ngalumdlalo wona ongadingi okunengi ngesikhathi umhlaba ulwisana lomkhuhlane we Covid - 19.

Kumdlalo we Baseball 5 akudingakali ukuba abadlali begqoke impahla zokuzivikela ekhanda lezandleni njengalokhu okufunakala kumdlalo we baseball odlalwa ngabadlali abayithoba munwe munye.

Facebook Forum

XS
SM
MD
LG