amalinks wokungena

Amapholisa Avimba Ukugcotshwa 'Kwenkosi' YaMaNdebele


Abanye abantu ababuye emkhosini wokugcoba uMnu. Stanley Raphael Khumalo.

Amapholisa koBulawayo akhokhelwa nguChief Superintendent Manzini Moyo ngoLwesibili avimbe ukugcotshwa abanye abathi kumele abeyinkosi yaMaNdebele, uMzilikazi wesibili, uMnu. Stanley Raphael Tshuma, enkundleni yeZimbabwe International Trade Fair (ZITF).

Amapholisa la atshele abaqoqe umkhosi lo ukuthi akukho emthethweni ukugcoba inkosi kwele Zimbabwe.

Imota zamapholisa ezilantuthu ehitshayo ...
Imota zamapholisa ezilantuthu ehitshayo ...

Inkulungwane lenkulungwane zabantu ebezilinde ukungena eZITF Arena emkhosini wokugcoba uTshuma bavinjwe ngamapholisa abalemota ezithwala intuthu ehitshayo lemibhobho.

Inengi labantu liveze ukudabuka bethi lokhu kukhombisa ukudelela kanye lokungahloniphi amasiko abanye abantu kunye lamalungelon abo.

Omunye wabakade bekhona, uMnu. Enock Dube, uthe kukhona okuvalwa nguHulumende ngoba bona akulamsindo abawudalileyo.

Abanye abahambe emkhosini wokugcoba 'inkosi'.
Abanye abahambe emkhosini wokugcoba 'inkosi'.

Evumelana loDube, uMnu. Alick Ngwenya, uthe okwenzakeleyo abakuthabeli ngitsho lakancane.

UGogo uAgnes Mlauzi uthe akula abangakwenza laloba bengazanga ngokulwa bona bafisa ukubalenkosi ngoba izwe limi ngamazwane.

Omunye njalo, uMnu. Charles Thomas, uthe okudanisayo yikwephulwa kwamalungelo oluntu kusenziwa ngabanye babo abensundu.

UMnunzana Alex Ndlovu yena uthe bafuna ukuphiwa imvumo yokugcotshwa kweNkosi yabo njalo sebezadinga usekelo lwamazwe omhlaba ngoba bengajonganga ukuguqula uhulumende oseHarare.

Sebephelelwe abantu abafuna kugcotshwe inkosi ...
Sebephelelwe abantu abafuna kugcotshwe inkosi ...

Phakathi kwabantu abakade beze emkhosini kubotshwe uMnunzana Welcome Ngwenya akwaziwa ukuba amapholisa amusekuphi. Incwadi evimbe ukugcotshwa kweNkosi uMzilikazi wesibili evele kuChief Superintendent Manzini iveze ukuba isisekelo sombuso kusahluko 274-77 kavumeli ukuba kubeleNkosi eZimbabwe, esithi ukuze umkhosi lo uqhubeke kumele kubelomhlangano ozagoqela iNduna zonke zeZimbabwe kanye lomphathintambo wazo.

Amapholisa ahlalisa abantu phansi phandle kweZITF abafuna ukuthi kugcotshwe inkosi yesizwe sikaMthwakazi.
Amapholisa ahlalisa abantu phansi phandle kweZITF abafuna ukuthi kugcotshwe inkosi yesizwe sikaMthwakazi.

Uthe kumele kuvunyelwane ngoba kudala eyinye iwofisi yobukhokheli ngakho kufuze kungenele lamanye amazwe omhlaba njalo bayazi ukuba bebemele babuthane kodwa akukho emthethweni.

Amasango enkundleni yeZITF atshone evalwe ngamapholisa kanye labaphathi beZITF, bengavumeli ukuba abantu abaze emkhosini bangene njalo abakade bevusa umhlonga bebesethuselwa ngokubotshwa.

Facebook Forum

XS
SM
MD
LG