amalinks wokungena

USaviour Kasukuwere Uxotsha Amakhansila koBulawayo


UMnu. Saviour Kasukuwere. (Photo: Minister's Official Twitter Account)

Umsekeli kaMayor kanye lokhansila kaWard 21 edolobheni lakoBulawayo sebemiswe umsebenzi ngumphathintambo kahulumende wezabelo lezakhiwo zikazulu, uMnu. Saviour Kasukuwere, ebethesa umlandu wokuphatha butshapha umsebenzi lokungathembeki.

Ekhuluma lentathelizindaba ngoLwesibili emawofisini ebandla lakhe leMDC-T, umsekeli kaMayor wakoBulawayo, uMnu. Gift Banda, uthe bona lokhe besemsebenzini njalo lencwadi ezibamisa umsebenzi abakazitholi.

Uthe le yindlela yebandla elibusayo yokuzama ukubaxotsha umsebenzi ngoba lamacala ababhekane lawo awala bufakazi.

UNkosikazi Barbra Tanyanyiwa, omela izisebenzi zikamanisipala wako Bulawayo, uthe indlela icala leli eliphathwe ngayo akulandelwanga umthetho njalo kusobala ukuthi kungeniswa ezombusazwe.

Uthe indlela uKasukuwere aguqule ngayo umthetho ngomnyaka odluleyo sokumuphe amandla okuxotsha amakhansila labasebenzela uhulumende mahlayana.

UMnu. Iphithule Maphosa, obona ngokwethulwa kwemibiko kubandla leZAPU, uthe abantu laba baxotshiwe sebebulele idolobho leli.

Okusikhundla sinye kubandla leMatabeleland Revolutionary Party, uMnu. Mbonisi Gumbo, uvumelana lokwenziwe nguKasukuwere esithi okhansila bakoBulawayo bangamagwelegwele njalo ngabantu bokuza inengi labo.

UMnu. Gift Banda (ogqoke isembatho esimhlophe) uthi kalacala.
UMnu. Gift Banda (ogqoke isembatho esimhlophe) uthi kalacala.

Olwela amalungelo kazulu, uMnu. Mbuso Fuzwayo, uthe kulusizi ukuthi inkokheli ezithenjwa nguzulu zifumanwe zilamacala angacaciyo.

UBanda wetheswa icala ngaphansi komthetho wamadolobho kusigaba 114 (1) (C) se-Urban Councils Act Chapter 29:15.

UKasukuwere uthi uBanda wasebenzisa amandla akhe njengomsekeli ka-mayor wathola imhlabathi ku Stand Number 18826B, Town House Ascot, ngomnyaka ka2015, waphinda njalo wazitholisa esinye koBulawayo esasimele sithengwe ngaphansi kohlelo lwe tender.

Ukhansila kaWard 21, uMnu. Rueban Matengu, akangenanga umhlangano laboNozindaba ukuba achaze olwakhe udaba aluxotshelweyo.

UBanda uthe kalacala alidalayo ngoba walandela indlela ekutholeni indawo yeAscot kuthi eyesibili kayazi njalo ulobufakazi.

UBanda uthe ulakho ukuphanyeka udaba lwakhe ethethwandaba ngoba bambumbele amacala angawadalanga.

Facebook Forum

XS
SM
MD
LG