amalinks wokungena

'Kuyesabeka Ukugugudeka Komnotho weZimbabwe'

  • Bennedict Nhlapho

Imigwaqo isimagodigodi koBulawayo.

Izizalwane zeZimbabwe ezihlala kwamanye amazwe ekade zethekelele ekhaya ngekhefu leKhisimusi zithi zidane kakhulu ngesimo esibi somnotho elizweni.

Labo abesebeleminyaka eminengi bengayi ekhaya bathi bethuswe yikujujuka kwezakhiwo koBulawayo, isimo seBulawayo Centre, amagodigodi emgwaqweni, ukuvalwa kwamafekithali lobuyanga emphakathini jikelele.

UMnumnzana Naison Sibanda uthi wethekelele kunkampani yeUnited Refinaries eseKelvin duzane leNkulumane Complex wathola indawo ezinengi sekukhalimpukane sokusele ihlekananje lezisebenzi eziyenza isepa.

UVusa Ndlovu, obeseMganwini, uthi baqede insuku ezintathu bengelamanzi.

Ngakwelinye icele, uNkosazana Sichelesile Khumalo, uthi uzwe usizi ngesikhathi efika eBulawayo Centre esifana lonxuwa nxa uyiqathanisa lendawo zakweleSouth Africa ezakhiwa sikhathi sinye layo.

“Ama building asedilikile, avidlikile, amangobongobo awabonakali lokuthi kusedolobheni kungathinje kusemakhaya. Imiduli ayiselapenda, ayikhonje into ebonisa ukuthi iBulawayo or iZimbabwe ingaphinda ivuke.”

Amafekithali amanengi asevaliwe koBulawayo.
Amafekithali amanengi asevaliwe koBulawayo.

UNkosazana Nomaqhawe Moyo uthi akusakhulunywa-ke ngamagodigodi emigwaqweni abanye abathi sekufananje lokuthi kugcwele iziziba lamachibi emigwaqweni.

“Imigwaqo yakhona akulamuntu oyilungisayo. Amapothole lokhe engezeleleka semakhulu engathi ngama dish. Nxa izulu linile kuyagcwala amanzi bese ku khozela ama accidents ngoba abantu bayabe bevika ama lane wonalawo alama potholes besiyangena kuma lane ezinye izimota besezicina sezitshayisana.”

Akusakhulunywa njalo ngobuyanga ebantwini njengoba emakhaya labo abangelazihlobo eziseGoli sebephila ngengqweqwe zomlomo nxa bengasatholanga ukudla kosizo enhlanganisweni ezisiza abantu.

Enye njalo injiva uLizwe Sibanda uthi sekubamangalisa ukuthi injongo yama bond notes ibivele ingeyani.

“Besicabanga ukuthi amabond note azasiza ukuthi ama line lawa kunciphiseke kodwa hayi kulobunzima. Yeyi njengoba izikolo sezizavulwa so, asazi ukuthi siyophephela kuphi.

INKOHLAKALO YAMAPHOLISA

Uthi inkohlakalo yamapholisa omgwaqo yiyo etshiye abanengi bengelamathe njengoba ethi kwezinye indawo amapholisa abebangisana ukuthola imali yesifumbathiso.

“Uyazi emgwaqweni akuhambeki. Asimapothole wena. Phezu kwamapothole behlanyele amapholisa, yeyi! Ah! Kunzima. Kodwa isimanga engikunanzeleleyo yikuthi amapholisa lawa yebo bakhona, siyabonga, kodwa lapho abakumisa khona abadingi zinto ezinengi, abakufunayo kuphela yimali.”

Abanye bathi kulobufakazi bokuthi uhulumende kaselandaba labantu.

UNkosazana Lydia Ncube, olomfowabo ovalelwe ejele eKhami, uthi bathole ucingo lokuthi umfowabo usevalelwe esibhedlela seMpilo ngoba kalagazi ngakho kufuneka bona njengemuli balithenge lelo gazi, okuyinto athi bekufanele kube ngumlandu kahulumende ngoba umfowabo usezandleni zakhe.

Inengi labantu beZimbabwe laba bathi sebehlele ukuqoqana ngendawo abavela kuzo bebonisana ngokuthi kuyini abangakwenza ukuthuthukisa indawo zabo.

XS
SM
MD
LG