amalinks wokungena

Kuhlolisiswa Imithetho eSouth Africa Ekhangelane Labokuza

  • Bennedict Nhlapho

Umhlangano lo uphehla udaba lwabantu bokuza.

Ugatsha lwendaba zasekhaya kweleSouth Africa luqhuba umhlangano wamalanga amabili ngenhloso yokuguqula imithetho yokungena lokuphuma kwabantu kulelo lizwe.

Umhlangano lo ongenwa ngabaphathintambo bamazwe eSouthern African Development Community (SADC) kugoqela leZimbabwe ulakho ukuletha inguquko enkulu kule imithetho okuyinto ezathinta kakhulu izinkulungwane zezizalwane zeZimbabwe ezethekelela loba ukuhlala kwele South Africa.

Kulo umthetho omutsha wokungena lokuphuma kwabantu elizweni ofuna ukwethulwa nguhulumende wakweleSouth Africa okuxotshwa ngawo kulo umhlangano, ukuphiwa imvumo yokuhlala elizweni kuzakuya ngokuthi umuntu uzakuba lusizo olungakanani kuntuthuko yakweleSouth Africa.

Uhulumende ufuna njalo ukuthi kube lamaVISA aphiwa izizalwane zemazweni eSADC ezizodinga umsebenzi kodwa zingela umsebenzi eziwufundeleyo.

Phansi kwalumthetho uhulumende ufuna ukuqinisa uhlelo lokwenqabela ukungena kwabantu elizweni ngokungekho emthethweni. Lokhu uzakwenza ngokubumba iqula elihlanganisa bonke ababona ngezomvikela lokulondolozwa kokuthula, kube yilo elilinda umngcele.

Bekuleziphathamandla zabohulumende.
Bekuleziphathamandla zabohulumende.

Umphathintambo wendaba zasekhaya kweleSouth Africa umnumnzana Malusi Gigaba utshele amanxusa angena lo umhlangano ukuthi lo umthetho bafuna usuthise indingeko zelizwe kuqala beseke ukhangela lezangaphandle kwelizwe.

“Lobanje siphakathi kwesivunguzane sokuthobelana kwemimoya phakathi kwabakwamanye amazwe lezizalwane zakuleli, siletha umthetho ozakwenqabela ukulwisana lokhu. Lumthetho esifisa wethulwe ugcwalisa indingeko zentuthuko lezokuthula elizweni ubuye usuthise njalo okufuneka sikwenzele amanye amazwe.”

Ufuna njalo ukuthi ezabelweni zonke zelizwe kube lezindawo okugcinwa khona labo ababanjwe beselizweni ngokungekho emthethweni.

Umgcinisihlalo wenhlanganiso yeZimbabwe Community in South Africa, umnumnzana Ngqabutho Mabhena laye ongomunye wamanxusa kulo umhlangano uthi bayawuncoma lo umthetho omutsha.

“Ma sikhangela idraft white paper leyi ikhuluma ngokuthi kuzaba le SADC work VISA. Iyakhuluma futhi langamacross border trade VISA. So sicabanga ukuthi ma ingaphumelela, laba abavele sebekhona eSouth Africa besebenza sicabanga ukuthi bazawathola la amadocuments. Yikhoke thina siyitshayela ihlombe igovernment yeSouth Africa ukuthi ibuye le draft policy enhle kangaka.”

Uhulumende ufuna ukuqinisa umthetho wezeziphepheli. Ufuna amahofisi asiza labo abadinga ukuzophephela abe semingceleni yelizwe ukuze bavunyelwe kuphela ukungena elizweni nxa izicelo zabo zokuphephela sezemukelwe.

Isiphathamandla sogatsha lwendaba zasekhaya esibona ngezokungena kwabantu elizweni umnumnzana Jackie Mckay, uthi lokhu kuzasiza ukuvimba labo abangena elizweni besithi bafuna ukuzophephela kukanti bona bazifunela umsebenzi.

“Lamawofisi azasiza abazofaka izicelo zokuphephela ngokukuqala, asebefuna ukuba yiziphepheli, abafuna ukuphikisana lezinqumo ezizabe zenziwe ngezicelo zabo, asebefuna ukuba yiziphepheli kokuphela, kanye lengatsha zikahulumende ezipha uncedo, ezizaphathisa ukusuthisa indingeko zalabo abayabe sebephiwe imvumo yokuzophephela elizweni.”

Ngokwesifiso sikahulumende kulo umthetho, ukuthi umuntu wakwelinye ilizwe abe yisizalwane sakwele South Africa kuzakwenziwa kube nzima kakhulu. Uhulumende ufuna lalabo osekubonakele ukuthi balusizo elizweni baphiwa isikhathi sokuhlala elizweni eside hatshi imvumo yokuba yizizalwane zakwele South Africa.

UMnu. Ignatius Chombo.
UMnu. Ignatius Chombo.

Abakwamanye amazwe abalamakhono emisebenzi asilelayo kweleSouth Africa , labo bazaphiwa isikhathi eside sokuhlala elizweni.

Abaphila ngokuyathenga lokuthengisa impahla kweleSouth Africa okuyindlela yokuziphilisa yabanengi eZimbabwe, bazaphiwa uhlobo olwehlukileyo kweVISA.

Lumthetho ofiswa ngeleSouth Africa uveza njalo ukuthi ebantwini bonke abethekelele eleSouth Africa eminyakeni esanda kwedlula, labaxotshwe kweleSouth Africa bengene ngokungekho emthethweni iZimbabwe ngelinye lamazwe amathathu aphezulu kuleni nani.

Umnumnzana Mabhena uthi abakuthandi njengezizalwane zeZimbabwe ukuthi kube yibo abagcwala kweleSouth Africa.

“Besifisa ukuthi izizalwane zeZimbabwe ziyabhalisa ukuvota zivote ngo 2018, kube lohulumende omutsha okuzakwenza ukuthi kungabi labantu abanengi abahlala becrosser amaborder besiza lapha eSouth Africa. Sibona iZimbabwe kulilizwe elihle njalo elilama minerals okokuthi nxa ilizwe lingaphathwa kuhle angeke sibuye siphephele la eSouth Africa.”

Kukhangelelweke ukuthi izifiso zogatsha lwendaba zasekhaya lezi ezingakabi ngumthetho ogcweleyo, zisiwe edale labaphathintambo kweleSouth Africa, bese zisiwa ephalamende ngenjongo yokuthi zemukelwe, zingakasiwa kumongameli Zuma ukuze zibe ngumthetho ogcweleyo.

Facebook Forum

XS
SM
MD
LG