amalinks wokungena

Breaking News

Ungenwa Ngabanengi Umthandazo Wokukhumbula U-Itai Dzamara Owanyamalala Eminyakeni Emihlanu Edluleyo


Emthandazweni wokukhumbula uItai Dzamara oseleminyaka emihlanu engabonakali

Abenhlanganiso ezilwela ilungelo loluntu kanye labamabandla ezokholo bangene umbuthano womthandazo wokukhumbula omunye wababesemkhankasweni wokulwela ilungelo loluntu, uItai Dzamara osefikise iminyaka emihlanu engaziwa ukuthi ungaphi ngemva kokuthunjwa ngababecatshangelwa ukuba ngabezomvikela abasebenza nsitha ngomnyaka ka 2015.

Unkosikazi Sheffra Dzamara loninazala uNkosikazi Benhildah Dzamara
Unkosikazi Sheffra Dzamara loninazala uNkosikazi Benhildah Dzamara

Unkosikazi Sheffra Dzamara uveze ukukhathazeka okukhulu ngokuba lokhe engaziwa lapho akhona umkakhe.

“ Kunzima ukwazi ukuthi isimihlanu iminyaka singazi ukuthi uItai ukuthi? Izibulo lethu lalileminyaka eyikhombisa khathesi useleminyaka elitshumi lambili, iwesibili wayeleminyaka emibili. Kunzima ngoba babunza nsuku zonke ukuthi ubuya nini uyise wabo. Angilayo impendulo, kuyangizwisa ubuhlungu lokho kodwa ngitshiyela konke kumdali.”

Kwaba ngesifanayo lakunina kaItai unkosikazi Benhildah Dzama yena okhalaza kumongameli Emmerson Mnangagwa ukuba enze konke okusemandleni akhe ukusiza ekuthini avezwe umtanakhe.

Emthandazweni wokukhumbula uItai Dzamara oseleminyaka emihlanu engabonakali
Emthandazweni wokukhumbula uItai Dzamara oseleminyaka emihlanu engabonakali


“Mina njengomama, ngiyakhalaza kunkokheli ukuthi nxa beyibo abamthathayo, bamveze. Bamxolele nxa kuyikuthi wabaphambanisela, ngiyacela ngomusa wenkosi ukuthi baxole ”.

Omunye wabasebenza lo Itai emkhankasweni wokukhuthaza ukususwa kowayengumongameli Robert Mugabe, owe Occupy Africa Unity Square – OAUS u Charles Nyoni ugcizelela elokuthi bengasafuni ukubuthana njalo bekhumbula omunye wabo, befuna avezwe.

“Uhulumende wethu okhokhelwa nguMnangagwa uyakwazi ukuthi kuyini okwenzakalayo ku Itai njalo kumele azimisele ukuthi anike imuli yakodzamara i closure ukuthi bathole ukubhidliza impahla zika Itai njalo lokuthi imuli yakhe iqhubekele phambili.”

Umabhalane omkhulu wogatsha lukahulumende lokwethulwa kwemibiko, umnumzana Nick mangwana utshele izizalwane zeZimbabwe ukuba uhulumende engafuni ukuba kube loyedwa nje oyisizalwane se Zimbabwe onyamalalayo kungaziwa lapho akhona.

UNyoni uthi ayamcunula amazwi kahulumende njalo kuyinto edanisayo ukuzwa abezomvikela besithi badinga usizo kuzulu kuloludaba luka Itai.

"Ngoba u Itai ethunjwa, kwabanjwa i number plate eyemota emhlophe i pick up eyamthwalayo, saya lapho okurejestwa izimota basitshela ibizo lomuntu olemota leyo, samdinga lowo muntu saze samthola, uhlala ngaseMbare. Yena wasitshela ukuthi imota le wayitengiselwa ku auction eye ZRP, wasipha kanye le proof eyama receipts awe payment kanye lamabhuku awemota owokuthi sibili imota le wayeyithengile eyithengiselwa yi ZRP. Sakuthatha konke lokho, lebizo lakhe, lesithupha sakhe sayenza ama copies, saya lakho emapholiseni, safika kumapholisa ayesenza uphenyo kuloludaba, sabanikeza le i information ukuthi bayithathe bayisebenzise, kodwa kusukusela khonapho kuze kube khathesi, akula lutho abalwenzayo.”

Otshumayele kulomkhosi, umqondisi wenhlanganiso yeZimbabwe Devine Destiny – ZDD uBishop Ancelimo Magaya uxwayise uMongameli Emmerson Mnangagwa lohulumende wakhe ukuba batsho iqiniso lokuba ungaphi njalo wenziwani u Itai.

“Mina njengomama, ngiyakhalaza kunkokheli ukuthi nxa beyibo abamthathayo, bamveze. Bamxolele nxa kuyikuthi wabaphambanisela, ngiyacela ngomusa wenkosi ukuthi baxole.”

Omunye wabake bathunjwa wanyamalala okwamaviki amathathu, umqondisi weZimbabwe Peace Project – ZPP unkosikazi Jestina Mukoko uthi kuyadanisa ukuthi isimihlanu iminyaka lokhe wanyamalalayo u Itai lanxa uhulumende wathembisa ukwenza konke okwakusemandleni akhe ukudingisisa ukuthi kuyini okwenzakalayo.

“Akudingwe kuxazululwe, isizwe saziswe ukuthi kuyini okwenzakala ku Itai. Ngoba u Itai kazalwanga eyedwa, uzelwe ngumama lobaba, bayaphila bafuna umbiko ophathelane lomtanabo. Ulomkakhe, ulabantwana abancane abalokhe bedinga ukuthi ubaba ungaphi. Yiyo leyo mibiko esiyidingayo, ngoba kudala besiya kudale lomthethwandaba, kwathiwa abantu bayabe betshelwa, izikhathi kuhamba, angikhumbuli ukuthi satshelwa kangaki. Umnyaka wonke ophelileyo, lalowana owaphelayo, lalowana owaphelayo, angikhumbuli sitshelwa ukuthi kuyini okwenzakalayo lokuthi amapholisa asenzeni.”

Ngemva kokunyamalala kukaDzamara, abenhlanganiso yamagqwetha alwela ilungelo loluntu abenhlanganiso ye After Zimbabwe Lawyers For Human Rights badinga ukuthola isiqondiso somthethwandaba waphezulu oweHigh Court sokulaya amapholisa ukuba amdinge ngokuphangisa kodwa kuze kube lamuhla lokhe kungakenziwa lokho.

Kungalesi sizatho Mukoko esithi abenhlanganiso eziphatheke kumikhankaso yokulwela ilungelo loluthu bekubone kufanele balobe ingcwadi yezikhalazo abazokuyayinikeza kumongameli Emmerson Mnangagwa phezu kodaba luka Itai.

“Sithi thina sifuna impendulongoba engena kumbuso, ukhulume ukuthi kuzaba lomahluko lombuso obukhona. Njalo engakangeni kumbuso, ngiyakhumbula mina ngomnyaka lapho okuthethwe khona u Itai, osengumongameli khathesi wathi yena, its barbaric, ukutsho ukuthi ngesiNdebele ngingathi mina, yinto engalunganga ukuthi umuntu angaphonguthunjwa nje, kuthiwa kasabonakali ukuthi ungaphi. Asazi ukuthi uyawakhumbula yini amazwi wonalawo? ”.

U Itai Dzamara wathunjwa mhla ka 9 Mbimbitho ngomnyaka ka 2015 eyegelwa inwele emzini we Glenview 7, lalamuhla lokhu akaziwa lapho ekhona.

Abenhlanganiso ezitshiyeneyo ezigoqela eye European Union bethule imibiko besola ukunyamalaliswa kwabantu elizweni abagoqela uDzamara uhulumende esithi kazi lutho ngabo.

Abaphatheke kulomkhosi bakubeke sobala ukuba lo kumele kube ngumnyaka wakucina bebuthana ukukhumbula omunye wabo uItai yena ongaziwayo ukuba ungaphi.

Udaba lombuthano womthandazo wokukhumbula uItai Dzamara siluphiwa nguMavis Gama
please wait

No media source currently available

0:00 0:08:39 0:00

Facebook Forum

XS
SM
MD
LG