Umphathintambo obona ngokwethulwa kwembiko uNkosikazi Monica Mutsvangwa uthi labo abethesa imuli kaMongameli Emmerson Mnangagwa icala lokuphatheka kumisebenzi yenkohlakalo baqamba amanga bejonge ukuphehla umvukela.
Ekhuluma lentathelizindaba izolo, uNkosikazi Mutsvangwa uthe abantu laba bafuna uzulu avukele uhulumende ngokutshengisela ezitaladeni.
Omunye wabantu abayisithupha ababotshwe besetheswa icala lokusebenza loNkosazana Henrietta Rushwaya kudaba lokuzama ukuphuma elizweni legolide ngudlu, uGift Karanda nguye wowatshela amapholisa ukuthi igolide leli lalingelikaNkosikazi Auxillia Mnangagwa lendodana yakhe uCollins.
Kodwa uNkosikazi Mnangagwa uyakulandula lokhu.
URushwaya labanye bakhe balokhe bevalelwe kodwa sebecele ukukhululwa ngumthegthwandaba ngemali yesibambiso, ibail.
Ocubungula ezombusazwe uMnu Bekezela Maduma Fuzwayo usole amazwi kaNkosikazi Mutsvangwa esikuthi kumele ekele amapholise enze uphenyo lwawo aphume leqiniso.
Amapholisa lohulumende bethule imbiko ngeSonto besithi ngamanga ukuthi igolide leli ngelikaNkosikazi Mnangagwa ngemva kokuba yena umkaMongameli ethe amapholisa kumele atshele uzulu ukuthi ulecala yini kumbe umsulwa kuloludaba.
Lokhu kusolwe ngabanye besithi okwenziwe kufana lokwethusela amapholisa.
Kodwa igqwetha uMnu Dumisani Dube utshele iStudio 7 ukuthi lanxa uNkosikazi Mnangagwa elelungelo lokuzivikela nxa esetheswa icala, amapholisa ebengamelanga alalele inkuthazo yakhe yokuthi atshele uzulu ukuthi ulalo na icala kumbe hatshi.
Kusenjalo, ibandla leMDC Alliance lithi uMayor walo weChintungwiza uMnu Lovemore Maiko ubotshiwe izolo esetheswa icala lenkohlakalo.
Ibandla leMDC-T lona lithi amalunga eMDC abotshwe ngeSonto ezama ukungena ehofisini ebangiswana phakathi kwalelibandla leMDC Alliance, iMorgan Tsvangirai House, eHarare, azamiswa emthethwandaba namuhla.