Umkhosi wokunanza ukuqakatheka komsebenzi wabezomvikela oweZimbabwe Defense Forces Day owenzelwe eHarare ngoLwesibili ubungela bantu abanengi abaphatheke kuwo njengeminyakeni njalo abanye bathi mhlawumbe kutshengisa ukukhathazeka kukazulu ngokungaziphathi kuhle kwabakubutho kumaviki edluleyo lapho abadubule babulala abantu abakade betshengisela.
Umkhosi lo uvame ukugcwalisa phamu inkundla yeNational Sports Stadium eHarare abantu bezobukela imidlalo kanye lemisebenzi etshiyeneyo yabakubutho lesizwe ebalisela amapharashuti, indizamtshina kanye lomdlalo wenguqu, kodwa emkhosini walonyaka kubuye ingcosana yabantu.
Ngomnyaka odluleyo amabutho acina evala intuba zokungena enkudleni sekugcwele phamu okwenza abanye bacina bebuyela emizini yabo.
Izakhamizi ze Harare ezinengi ziveze ukuphatheka kubi ngokungavumi kwabebutho ukuthi igazi lalabo abadutshulwa kuviki eledluleyo eHarare lisezandleni zabo okuyinto elethe lokhu kuthandabuza ngomkhosi walonyaka.
UMnumzana Mengezi Sibanda uthe kuqakathekile ukuthi abebutho baxolise kuzulu ukuze uzulu abelethemba lokuthi ugcinekile elizweni.
“Thina amabutho ethu siyawathanda aweZimbabwe kodwa besikhangelele ukuzwa umkhokheli wamabutho exolisa ngento eyenzwa ngamabutho eZimbabwe hayi ukuthi iMDC yiyo eyabangela ukufa kwabantu, yikho singayanga enkundleni ngoba asithabanga ngento leyi eyenzakalayo kodwa ibutho siyalithanda eleZimbabwe,” kutsho uMnu. Sibanda.
Ekhuluma emathuneni amaqhawe eHeroes’ Acre ngoMvulo, umongameli Emmerson Mnangagwa usole umanyano we MDC Alliance ukuba yiwo owabangela ukufa kwabantu kudlakela olwenzakale eHarare lapho abebutho bedubule babulala abayisithupha.Uphinde wakutsho ngoLwesibili emkhosini weDefense Forces Day.
UMnumzana Themba Mlotshwa uthi ilanga lanamhlanje alimelanga lijatshulelwe ngenxa yesenzo esibi samasotsha sokubulala abantu.
Isikhulumeli somkhokheli webandla le MDC Alliance uMnumzana Nkululeko Sibanda uthi ibandla lakhe limangele ngemibiko ka Mnangagwa yokuthi iMDC Alliance yabangela ukudutshulwa kwabantu eHarare esithi ibutho liphansi kwakhe njalo yilo elamenza waba ngumongameli welizwe ngomnyaka odluleyo kukanti lisabela kuye yedwa njengomkhokheli walo hatshi iMDC Alliance.
“Udubo esilalo yikuthi kukhanya kungani upresident Mnangagwa kawazi umsebenzi wakhe njengo President ngowokuthi nguye otshela amasotsha okokwenza ukuthi aphuma nini enkambeni njalo aphenduka nini. Kukhanya angani umsebenzi wakhe uPresident Mnangagwa kakawazisisi nxa ewazisisa kusuka kukhathaze ukuthi hanti kungabe kukhona yini okunga hambi kuhle kumbe sephangisa ukukhohlwa, nxa engazwisisisi namhlanje ngemva kwenyanga eziyisitshiyangalombili engu mongameli ukuthi ukudutshulwa kwabantu ngamasotsha kumbe ukudutshulwa kwemibhobho ngamasotsha kuphela nxa upresident etsho njalo hatshi ukuthi kungavuka nje kuthiwa kwenzakele,’ kutsho uMnu. Sibanda.
UMnu. Nqaba Puti isakhamuzi seHarare uthi ilanga lanamhlanje liqakathekile ngoba likhuthaza ukubonga ibutho lesizwe elizinikele ukuvikela ilizwe:
“Thina sithabe kakhulu ukuthi ilanga lanamhlanje siyakwanisa ukuthi sikhumbule njalo sikhangele amabutho ethu siwakhumbula ukuthi yibo abantu abazinikele ukugcina ilizwe lethu njalo besivikela ezitheni zethu. Silethemba lokuthi lokhu esikubone namuhla besitshengisela enkundleni yikho abazakwenza qotho nxa kulezitha ezikhangelele ukubuya zizolwisana lathi.”
Emkhosini lo, ibutho lelizwe libukise imisebenzi kanye lamalungiselelo alo ekuvikeleni eleZimbabwe.
Kumkhosi ofanayo koBulawayo enkundleni yeWhite City Stadium, umphathintambo wedolobho uNkosikazi Angeline Masuku uhlole ibutho lifola andubana abale amazwi kaMongameli Mnangawa awokuhlonipha umsebenzi wabezomvikela elizweni.
“Ilanga lalamuhla liqakathekile lisibonisa ukuqakatheka kwemisebenzi yebutho. Siyalibonga ibutho lakuleli lisebenza gadalala lisivikela ezitheni zethu Kanye lokutholisa uzulu usizo olwehlukile njalo lokhu sikubone ngemisebenzi yabo abayibonise lamhlanje,” kutsho uNkosikazi Masuku.
Ilunga leCentral Committee kubandla leZANU-PF, uNkosikazi Molly Mpofu uthi uyajabula ngokusebenza kwebutho leZimbabwe.
Isakhamuzi sakoBulawayo esasikubutho, esingene umkhosi walamuhla, uMnunznana Sidingani Nkomo ubuke ukuqoqwa kwelanga lalamuhla:
“Ngiyajabula ngelanga lalamhlanje njalo mina ngalwa impi bengilibutho njalo kodwa akukho okubambekayo esiphuma lakho.”
Abanye abaphatheke kulumkhosi basole ukuxokozela kwamalunga ebandla elibusayo eleZANU PF angene kulumbuthano egqoke impahla zebandla elibusayo, kanye lenani eliphansi labantu abakade bekhona.
UMnu. Thomas Sithole uchaze ukuba ibutho liphelelwe yinhlonipho kazulu kulandela isehlakalo sangemva kokhetho, kukanti uMnu. Victor Charara uthi akusizi ukuya eWhite City Stadium ukuyathakazelela ilanga lebutho.
Osakhulayo uBhekinkosi Dube yena kavumelanaga labanye, esithi ilanga leZDF liqakathekile. Elinye ilunga leZANU-PF koBulawayo, uNkosikazi Judith Ncube uveze ukuqakatheka kwelana leZDFD.