Lanxa ibandla le Zanu PF lihlala libabaza uhlelo lwayo lokuthuthukisa umnotho welizwe olwe Zimbabwe Agenda for Social and Economic Transformation (Zimasset), eleZimbabwe lokhe lithembele kusizo oluvela kunhlanganiso ezigoqela eyomanyano wamazwe omhlaba ebona ngezentuthuko olwe United Nations Development Assistance Framework (ZUNDAF ).
Ekhuluma lentathelizindaba eHarare ngoLwesithathu emhlanganweni wokwethula imali esibuthaniswe phansi komanyano we ZUNDAF, umqondisi wenhlelo ze United Nations eZimbabwe, uMnu. Bishow Parajuli, uthe eleZimbabwe aliladubo lwendlala kodwa kulokusilela kokudla.
Lokhu kusekelwe ngunobhala omkhulu emawofisini kahulumende, uDr. Misheck Sibanda, othe sokunganeno ukusilela kokudla elizweni.
Uncome uhlelo lwe ZimAsset esithi soluthela izithelo ezikhanyayo okwamanje kulandela ukusungulwa kwalo ngomnyaka ka2013.
Uthethe lelithuba uSibanda ukulandula imibiko ebeka umlandu ezinye zeziphathamandla eziphatheke kwezokunikeza ukudla kuzulu ukuba zenza lokho zikhangela ukuba umuntu ungowaliphi ibandla.
Ukusebenzelana ngaphansi komanyano kahulumende lowenhlanganiso zamazwe omhlaba we ZUNDAF lokhu, kubikwa sokubuthanise izigidi ezedlula amakhulu amathathu zamadollar - $322 million, ku$326 million yemali edingakalayo ukuba isetshenziswe phakathi kweminyaka emine kusukela nyakenye kuze kuyefika umnyaka ka2020.