amalinks wokungena

Breaking News

Lenza Kahle Iqembu leZimbabwe Emdlalweni Wekhilikithi


FILE: Utshaya kuzwele umdlali weZimbabwe uSean Williams.

Iqembu elimela ilizwe leZimbabwe emdlalweni kakhilikithi ligqibe imidlalo yezibaya liphezu kwengalane yesibaya sika Group B kumncintiswano we ICC Cricket World Cup Qualifiers ngemva kokuba ngutshiki lobhanqa leqembu le Scotland emdlalweni oqhutshelwe edolobheni lako Bulawayo ngoMvulo.

Iqembu le Zimbabwe liqede imidlalo yalo lilemiklomelo eyisikhombisa okulinani elilingana leliphethwe liqembu le Scotland kodwa ele Zimbabwe lihlezi phezu kwengalane ngoba lile net run rate engcono.

Abafana be Zimbabwe bale net run rate ye 1.035 kuthi abe Scotland bale net run rate eye 0.855.

Zombili iZimbabwe le Scotland zizaqhubekela phambili ziye kusigaba esilandelayo esomncintiswano esibizwa ngokuthi yi Super Six ndawonye leqembu le Afghanistan lona eliqede imidlalo yezibaya lisendaweni yesithathu kusibaya sika Group B.

Amaqembu aphumelele ukuyadlala kusigaba se Super Six esuka kusibaya sika Group A ngabalisa ele West Indies, ele Ireland kanye lele United Arab Emirates njalo lawa amaqembu azaxegwa lalawo aphumelele esuka kusibaya sika Group B kuthi ngemva kwalimidlalo amabili azatholakala elemiklomelo eminengi yiwo azadibana kudingwa intshantshu ikanti ayabe evele esethole ilungelo lokuyadlala kumncintiswano wezizwe zomhlaba ozaqhutshelwa elizweni le England lase Wales ngomnyaka ozayo.

Sikhangele umdlalo we volleyball: Inhlanganiso ye Bulawayo Volleyball Association iqhube umncintiswano wokulungiselela ukuqala imidlalo yalonyaka njalo amaqembu anqobileyo ngabalisa ele National University of Science and Technology kucele labesifazane kuthi kucele labesilisa kunqobe iqembu le Highlanders.

Isiphathamandla senhlanganiso yeBulawayo Volleyball Association uWilliam Mazviro uthi lonyaka bakhangele ukuba umdlalo we volleyball uthuthuke kakhulu njengoba izikolo zemfundo yaphezulu lazo seziphatheka kumidlalo yabo.

“Kusizini yalonyaka ngiyathokoza ngoba lokhu engangihlala ngikhala ngakho ukuba siyawafuna amakolitshi emfundo yaphezulu kuzenzakala njalo sikhangelele ukuba babekhona khathesi silinde iLupane State kanye le Hillside Teachers College ukuthi labo babe yingxenye yethu. Sikhangelele ukuba kube lomncintiswano ozwayo ngoba lamaqembu atholakala emalokitshini afana lele Highlanders lawo asephendukile kuligi yethu.”

Amaqembu aphatheke kumncintiswano wangempelaviki kucele labesifazane ngabalisa ele NUST, eliphutshe lisendaweni yakuqala, ele Hurricanes eliphutshe lisendaweni yesibili, ele Luveve High School kanye lele Bulawayo Poly eliphutshe lisendaweni yesine.

Kucele labesilisa iqembu le Highlanders yilo eliqede lisendaweni yakuqala kuthi ele NUST liqede lisendaweni yesibili, endaweni yesithathu kubeleqembu le Hurricanes kuthi kweyesine bekuleqembu le Bulawayo Poly, endaweni yesihlanu kube leqembu le Milton High School kuthi eliqede lisemsileni ngele Luveve High School.

Facebook Forum

XS
SM
MD
LG