amalinks wokungena

Breaking News

IPakistan Isinqobe Iqembu leZimbabwe Kathathu Emidlalweni kaKhilikithi


Iqembu labesilisa elimela ilizwe le Zimbabwe emdlalweni kakhilikithi linqotshwe kabuhlungu ngele Pakistan emdlalweni wesithathu owohlobo lwe One Day International oqhutshelwe enkundleni ye Queens Sports Club ngoLwesithathu.

Iqembu le Zimbabwe yilo eliqale ukutshaya ibhola lathola ama runs ayisithupha lesikhombisa lilahlekelwe ngabadlali bonke kwathi ele Pakistan seliphendula latshaya ama runs angamatshumi ayisithupha lathoba munwe munye kungakafiki ama overs alitshumi njalo lilahlekelwe ngumdlali owodwa kuphela.

Limpumela eyomdlalo wangoLwesithathu itsho ukuba iqembu le Pakistan se linqobe eleZimbabwe kumncintiswano wemidlalo emihlanu eyohlobo lwe One Day International njengoba se linqobe kuyo yonke imidlalo emithathu asedlalwe yilawa maqembu okutsho ukuba iqembu le Zimbabwe alisenelisi ukunqoba njengoba sekusele imidlalo emibili.

Ekhuluma lentatheli zindaba zemidlalo ekupheleni komdlalo ukaputeni weqembu leZimbabwe uHamilton Masakadza uthe vele iqembu lakhe ngoLwesithathu kalizange like lidlale kuhle njalo sekuyisikhathi sokuthi bona njengabadlali bezinuke amakhwapha.

Obebukele lumdlalo njalo eyintathelizindaba yezemidlalo uNash Mkokwayarira uthi inkonkheli yomdlalo kakhilikithi kwele Zimbabwe kumele ixoxisane labadlali abaxabana layo phezu kweholo ukuze kumiswe ukuba iqembu leli liyale lilokhu libhaxabulwa kabuhlungu.

Ukudlala kwe Zimbabwe ngoLwesithathu akubanga kuhle njalo kwazikhanyele nje ekuqaleni komdlalo ngesikhathi labo abaqala ukutshaya ibhola besehluleka ukwala belokhu bevikela ama wickets.

Limpumela iyayangisa ngoba iqembu leZimbabwe alizake linqotshwe kanje lidlalela enkundleni ye Queens Sports Club yikho-ke okumele kwenziwe yikuba abadlali abafana labo Sikandar Raza labo Sean Williams kumele bephenduke bezoqinisa iqembu.

Iqembu leZimbabwe linqotshwe ngama runs angamakhulu amabili lelilodwa emdlalweni wakuqala kwathi kowesibili litshaywe ngama wickets ayithoba munwe munye.

Umdlalo wesine phakathi kweqembu le Zimbabwe lele Pakistan ukhona ngoLwesihlanu kuthi owesihlanu njalo ongowokucina ukhona ngeSonto

please wait

No media source currently available

0:00 0:01:52 0:00

XS
SM
MD
LG