amalinks wokungena

Breaking News

Yinjabulo Ngokuphumelela kwamaWarriors


Iqembu leZimbabwe Warriors
Iqembu leZimbabwe Warriors

Bayathokoza abalandeli beqembu elimela iZimbabwe emdlalweni wenguqu ngokuphumelela ukuyancintisa kumidlalo yeAfrican Nations Championships kweleRwanda ngomnyaka ozayo ngemva kokunqoba eleLesotho nge-goal aggregate ngeSonto.

Lanxa abalandeli beZimbabwe Warriors bevame ukukhala inyembezi zosizi lapho lidlala, ngempalaviki basele bewisa inyembezi zentokozo.

Umdlalo lo, odlalelwe eLesotho, ubungowehlandla lesibili njalo uphele zingutshiki lobhanqa 1 ka 1.

Emdlalweni wakuqala obukoBulawayo, amaqhawe eZimbabwe anqobe nge3 ka 1.

Lokhu kutsho ukuthi iZimbabwe inqobe iLesotho nge4 ka 2 nxa kuhlanganiswa impumela yemidlalo yomibili.

Selokhu umncintiswano lo waqalayo ngomnyaka ka2009, eleZimbabwe liphumelele ukungena kuyo yonke imidlalo yehlandla lokucina.

Omunye wabajabulayo ngokuphumelela kwamaWarriors nguStephen Sibanda yena othi ukunqoba kwaleliqembu kuhle kakhulu ngoba bona njengabalandeli besebekhathele yikuhlala bedaniswa yikudlala kwalo.

UJohn Mufundisi laye ngomunye wabatshayela iqembu leZimbabwe ihlombe esithi ukuphumelela kwalo kutshengisa ukuba kulethalenta lokudlala inguqu elizweni.

Premier Soccer League

Iqembu leTsholotsho lithe ngokunqoba eleWhawha nge 1 ka nya lakhuphuka layahlala endaweni yesihlanu nxa usuka ngaphansi kwengalane yemiklomelo, okuyisimo esipha umqeqetshi walo uLizwe Sweswe ithemba lokuba lingasinda ekugunyulweni kuPSL.

Iqembu leDynamos lona elibe ngutshiki lobhanqa 1-1 leFlame Lily selisesimeni esibi esokuvikela isicoco seligi njengoba selitshiywa ngemiklomelo emihlanu liqembu eliphezu kwengalane eleChicken Inn lona elizadlala lele FC Platinum ngoLwesithathu enkundleni yeLuveve.

Iqembu leZPC Kariba leqe layahlala kundawo yetshumi engalaneni ngemva kokubhaxabula ele Dongo Sawmills nge 4 ka 1 okutsho ukubana iqembu leHighlanders lona elizadlala leleChapungu ngoLwesithathu lehle layahlala kundawo yetshumi lanye.

Umdlalo obuphakathi kweqembu leHarare City leqembu leHow Mine uphele engutshiki lobhanqa 2 ka 2.

English Premier Soccer League

EleManchester United leleManchester City abe ngutshiki lobhanqa waphela kungela elenelise ukutshayela ibhola emambuleni.

Limpumela itshiye iqembu leCity lihlezi phezu kwengalane lilemiklomelo engamatshumi amabili lambili okulinani elilingana leliqembu le Arsenal lona elihlezi kundawo yesibili.

Kundawo yesithathu kuhlezi iqembu leWest Ham lona elinqobe eleChelsea nge 2 ka 1 njalo lilemiklomelo engamatshumi amabili okulinani elilingana lelileqembu le Manchester United lona elikundawo yesine.

Rugby

Amaqembu amela amazwe athi ele Australia lele New Zealand yiwo azadibana ku final eyomncintiswano wezizwe zomhlaba ngemva kokuphumelela kusigaba se semi final ngempelaviki edluleyo.

Iqembu le New Zealand linqobe ele South Africa nge 20 ka 18 kuthi ele Australia litshaye ele Argentina nge 29 ka 15.

EleSouth Africa leleArgentina azadibana kumdlalo wokudinga iqembu elizaphutsha likundawo yesithathu.

Cricket

Umdlalo wakuqala owohlobo lweTwenty20 phakathi kweqembu elimela ilizwe le Zimbabwe lelimela eleAfghanistan uphele iqembu leAfghanistan linqobe ngama wickets ayisithupha.

Lumdlalo ubusenkundleni yeQueens Sports Club koBulawayo.

Udaba lokunqoba kweqembu lenguqu elamaWarriors
please wait

No media source currently available

0:00 0:04:00 0:00
Lapho esitholakala khona

XS
SM
MD
LG