Seliphelelwe ngumphako kusigaba se Castle Lager Premier Soccer iqembu le Bulawayo City.
Iqembu leli selibe ngelesithathu elizagunyulwa kusigaba saphezulu ese Castle Lager Premier Soccer League loba nje linqobe ele ZPC Kariba nge 2 ka 1 emdlalweni odlalelwe enkundleni yeBarbourfields koBulawayo.
Lokhu kungoba iqembu elihlezi endaweni yesihlanu nxa usuka phansi kwengalane ele Chapungu libhaxabule ele Highlanders nge 4 ka nya okuyimpumela etsho ukuba likhuphule inani lemiklomelo elilayo laya kumatshumi amathathu lesikhombisa.
Iqembu le Bulawayo City lona lilemiklomelo engamatshumi amabili lanhlanu okutsho ukuba inani lemiklomelo elingenelisa ukuphutsha imidlalo yalonyaka lilalo ekupheleni kwemidlalo yalonyaka ngamatshumi amathathu lane kuphela.
Loba kunjalo umqeqetshi weqembu le Bulawayo City uBekithemba Ndlovu uthi isifiso sakhe yikuba banqobe kuyo yonke imidlalo emithathu abasele layo.
“Umdlalo wanamhla ubungekho lula kodwa vele iqembu leZPC liqembu elaziwa ukuba liqembu elidlala ibhola elizwayo njalo ukulihlohla kabili kutshengisa ukuba abafana bami bebezimisele.
Ngiyababonga ngokudlala ngomfutho abakwenzayo njalo sisiya kumidlalo emithathu eseleyo ngiyafisa ukuba sinqobe kuyo yonke yomithathu.
Amanye amaqembu osekusaziwa ukuba asephelelwe ngumphako ngabalisa ele Shabanie Mine kanye lele Mutare City Rovers.
Kweminye imidlalo edlalwe ngoLwesine: Iqembu le Dynamos linqobe ele Herentals nge 2 ka nya emdlalweni obusenkundleni yase Rufaro kuthi emdlalweni obusenkundleni yase National Sports Stadium iqembu le Black Rhinos libe ngutshiki lobhanqa leqembu le Nichrut 1 ka 1.
Iqembu le Nichrut yilo elihlezi endaweni yesine nxa usuka ngaphansi kwengalane yemiklomelo lilemiklomelo engamatshumi amathathu lantathu njalo kuzavela ngemva kwemidlalo emithathu eseleyo ukuba lona lizayala lilokhu lidlala kusigaba saphezulu yini ngomnyaka ozayo njengoba kulamaqembu ambalwa ahlezi phezu elingawahwitha nxa linganqoba kumidlalo elisele layo lifikise imiklomelo engamatshumi amane lanye.
