Kuliviki siseMidlands, eNkabazwe phela, lapho okwenzakale isiga esitshiye ngitsho labadala bekhuza umhlola kunsukwana ezedluleyo.
Kumiswe amantombazana amathathu asakhulayo emthethwandaba esetheswa icala lokudlwengula abesilisa phose abangamatshumi amabili.
Abathathu laba ngabathi uRosemary Chakwizira (24), uSophie Nhokwara (26) loNetsai Nhokwara (24).
Abathathu laba babotshwe lowesilisa oyedwa owayetshayela imota ababethumba ngayo abesilisa babe sebebadlwengula ngemva kokubanathisa umuthi olalisa inkophe kodwa ubuye uvuze inkunzi.
Amapholisa athi abathola belamajazi omkhwenyana adlula amatshumi amathathu amanye awo esebenzile elobudoda phakathi.
Abanye bacabangela ukuthi le yimisebenzi yobuthakathi, kanti abanye bathi lezi yizixhwali nje ezidla imithi engafanelanga enza imizwa yazo ihlale ivuse umhlonga sikhathi sonke.
Isiga lesi sitshiye uzulu weNkabazwe, ikakhulu abesilisa, bethithibele. Sixoxe lesakhamuzi seGweru uMnu Vodloza Sibanda yena othi sebedlela evalweni abesilisa kulummango.
Lalela ingxoxo yethu loMnu Sibanda kuhlelo Liphuma Lendaba, Litshone Lendaba.
Nxa kukhona ofuna sikhulume ngakho kuloluhlelo, thumela incwadi ye-mail kukheli ethi studio7@voanews.com.
