Abanye abantu eZimbabwe sebenatha ngamandla imithi yesilungu ehambelana lomvusankunzi.
Odokotela baveza ukuba limithi lamaphilisi, bekusaziwa kusetshenziswa ngabangaphilanga kuhle, besilela kwezemacansini ngenxa yemikhuhlane eyehlukeneyo okubalisa owe tshukela, inhliziyo loba eminye.
Bekuyimvelakanci ukubona owesilisa osesemutsha eyisebenzisa limithi lamaphilisi atholakala ngokulotshelwa ngodokotela kodwa labo asebebadala ukuze bengezelele idlabuzane.
Akusenjalo ensukwini zalamuhla, abatsha sekuyibo abawasebenzisa, ngendlela yokufuna ukujabulisa izithandani zabo ezinengi.
UDr. Sikhululiwe Ngwenya, uthe abanatha imithi le kukhanya belolwazi ngokuthi isebenzani.
UDr. Ngwenya uthe lokhu sokungenise abanengi engozini ngoba lokhe liqansa inani eliphuma kumaphephandaba kuthiwa ugijinyiselwe esibhedlela isitho sakhe somzimb, singasabuyeli kusimo esifaneleyo.
Kunhlolisiso eke yenziwa ngabenhlanganiso yeZimbabwe National Council of the Welfare of Children (ZNCWZ) iveze ukuba liyaqansa inani labasebenzisa lemithi lamaphilisi ngezizatho ezehlukeneyo.
Okhokhela uhlangothi lwenhlelo zenhlanganiso yeZNCWZ, uMnumzana Maxim Murungweni, uthe sebebanengi kakhulu abantu eZimbabwe abasebenzisa imithi le kodwa luyasilela ulwazi lokuthi isetshenziswa njani.
Lokhu kusekelwe nguMnu. Themba Dladla owalahlekelwa yisihlobo ngenxa yokuswela ulwazi olwaneleyo kungozi ekhona ekusebenziseni limithi yesintu leyamaphilisi ukwengezelela idlabuzane lemacansini.
Ufisa ukuba ngabe kuqhutshwa imikhankaso yokutholisa uzulu ulwazi ngalemithi lamaphilisi..
Abezempilakahle bathi okudanisayo yikuba isikhathi esinengi uzulu, ucabanga ukuthi uloyiwe lapho esebhekane lenkinga ngemva kokusebenzisa okwengezelela idlabuzane kwezemacansini.
Lokhu bethi sekungokunye kosekubangela imfa ngoba abaseduze bephuza ukusa umuntu esibhedlela ukuze ayethola usizo lokwelatshwa, lalapho engaphila ngoba kuthiwa ukhona omloyileyo.
