amalinks wokungena

Breaking News

Liyakhokhela Inani LabeZimbabwe Abafohlela KweleSouth Africa Besiyathenga Ukudla


FILE - Illegal Zimbabwean immigrants who work as farm laborers are seen inside their room on a farm near the Beitbridge border post, between South Africa and Zimbabwe, in the Limpopo Province, in March 2006.

Izizalwane zeZimbabwe zilokhu zifohlela ngobunengi kweleSouth Africa zisiyadinga ukudla lemisebenzi kungakhathalekile ngemithetho yokuhamba eqinileyo ehlose ukwenqabela ukumemetheka kwecoronavirus.

Ibutho lakweleSouth Africa okuyilo elilinda umngcele weSouth Africa leZimbabwe emfuleni uLimpopo lithi ngenyanga kaMpandula kuphela libophe izizalwane zeZimbabwe eziphose zifike izinkulungwane ezimbili (1,900) ziphakathi kokufohla zingena lokuphuma kweleSouth Africa endaweni ezingekho emthethweni.

Kuleli qula kulentsha ebanjwe ingena ukuzodinga imisebenzi. Inengi labo yilabo abangena kweleSouth Africa bezothenga ukudla lezinye impahla eziqakathekileyo edolobheni leMusina, bazithwale emakhanda lemahlombe babuyele eZimbabwe.

Isikhulumeli sebutho uBrigadier General Xolani Mabhanga utshele abezindaba ukuthi uhlupho lokungena kwezizalwane zeZimbabwe emngceleni weBeitbridge lukhulu kakhulu.

“Sidinga izinto ezinengi ezizasetshenziswa ngamasotsha ethu ukubona ukuthi umngcele wethu uvikelekile.”

Esinye sezizalwane zeZimbabwe obebanjwe ngamasotsha omngcelela ongathandanga ukuvezwa igama lakhe uthi impilo isinzima okokuthi sebezimisela ukwenza loba yini.

“Singena sithenge ukudla besesibuyela eZimbabwe ngoba impilo isinzima kakhulu eZimbabwe.”

Isikhulumeli sebandla leMthwakazi Republic Party umnumnzana Velile Moyo uthi kuyadanisa kakhulu ukubona umuntu esuka elizweni lakhe achaphe umngcele kabuhlungu esiyathenga isinkwa letshukela kwelinye ilizwe.

“Loba bengabotshwa laba bantu bazaqhubeka bebotshwa kodwa akuzukumisa ukuthi baqhubeke bengena. Ngoba kusazovulwa bazongena abantu ngobunengi babo ngoba akuhlaleki elizweni laseZimbabwe. Uzohlala kanjani elizweni ulambile. Abantu bayasuka bahambe bayephanda phandle ukuthi bakwazi ukuthola okuyangaphansi kwamakhala. Kodwa into edabukisa kakhulu yikuthi uhulumende waseZimbabwe akabonisi ukuthi kukhona azimisele ukuthi akwenze ukuthi aqede loluhlupho.”

Ababanjwa befohla lumngcele babikwa besiwa kwabogatsha lweSouth Africa lwendaba zasekhaya, lapho abafika betheswe icala lokungena elizweni ngokungekho emthethweni, ngemva kwalokhu bese bethwalwa beyetshiywa kuziphathamandla zomngcele eZimbabwe.

Umongameli Emmerson Mnangagwa usanda kutshela inhlanganiso yezizwe zomhlaba eye United Nations ukuthi inkinga zezomnotho eZimbabwe zibangelwa yizijeziso zomnotho ezethulelwa iZimbabwe. Uthi yizo ezenza iZimbabwe yehluleke ukugcwalisa inselela zentuthuko ezigoqela ukuqeda indlala, ukuthuthukisa ezamabhizimusi, ukuthuthukisa umnotho lokudala amathuba emisebenzi. Kodwake amabandla aphikisayo lenhlanganiso zenhlalo kazulu zithi udubo lwenkohlakalo luyakhokhela kuzo zonke eziphazamisa intuthuko yesimo somnotho welizwe.

Uhulumende usanda kwethula ukuthi uzaqhubeka ehlolisisa isimo segciwane leCoronavirus elizweni andubana avulele wonke umuntu imingcele.

Okwamanje imingcele ivulelwe zonke izizalwane zeZimbabwe ezifisa ukubuyela ekhaya, ezilamapermit okufunda, ukusebenza lawokuphiwa imvumo yokuhlala kwamanye amazwe. Iziphathamandla zikahulumende labameli babohulumende labo bayavunyelwa ukungena lokuphuma elizweni. Abatshayeli bamaroli athwala impahla eziqakathekileyo labo bayangena lokuphuma.

Abantu makhaza labanye abangekho kula maqula abakavunyelwa ukuphuma elizweni.

Kodwake inengi lezizalwane zeZimbabwe lithi ukuvulela wonke umuntu ukuthi aphume lokungena elizweni yikho okuzaphungula inani lalabo abafohlela kweleSouth Africa besiyathenga ukudla lempahla eziqakathekileyo.

Udaba Esilethulwa NguBenedict Nhlapho
please wait

No media source currently available

0:00 0:04:31 0:00


Facebook Forum

XS
SM
MD
LG