amalinks wokungena

Breaking News

Liyaqansa Inani Labaphila Ngokuthengisa Umzimba eBotswana


Uphenyo olwenziwe nguhulumende weBotswana lutshengisa ukuthi kulabesifazana abeZimbabwe abaphila ngokuthengisa imizimba yabo ezitaladeni zeBotswana abadlula inkulungwane.

Emini basebenza imsebenzi etshiyeneyo efana leyezindlini kukanti ntambama abesifazana laba basebenzisa imizimba yabo ukungezelela iholo elincane abalitholayo.

Kulabesifazana abeZimbabwe abangaphezu kwenkulungwane (1000) abaphila ngokuthengisa imizimba eBotswana, inani lesibili eluhlwini umakuqathaniswa lezizalwane zakwamanye amazwe eziseBotswana. EleBotswana yilo elihamba phambili.

Uphenyo olwenziwe lugatsha lwezempilakahle kweleBotswana lutshengisa ukuthi abesifazana laba basebenza kakhulu emadolobheni afana leFrancistown, Gaborone kanye lendawo zokwethekelela ezifana le Maun kanye leKasane.

Uhulumende weBotswana ubecwayisisa imigoqo abesifazana abathengisa imizimba abahlangana layo uma bedinga usizo ezibhedlela njalo lokubona ukuthi igcikwane lengculaza libhahe okunganani.

Umqondisi wenhlanganiso esebenza labesifazana abathengisa imizimba eFrancistown, unkosikazi Gaolape Makgarapa utshele iStudio 7 ukuthi bayakhathazeka ngendlela abesifazana laba abaphathwa ngayo ngakho bona bakhona ukubasiza…

EFrancistown kuphela kulabeZimbabwe abangamakhulu amathathu, 300, abathengisa imizimba kukanti edolobheni leGaborone inani lingaphezu kwamakhulu ayisithupha, 600. Edolobheni leKasane kulabedlula ikhulu.

Inani leli selitshiye abeZimbabwe kweleBotswana bebambe owangaphansi. Kodwa abanye bathi noma kulihlazo ukuthengisa umzimba, akulalutho omabesifazana laba abangalwenza bebhekane lokuswelakala kwemsebenzi eZimbabwe..

Kukanti umnumzana Aaron Nleya yena uthi akumelanga kuvikelwe ukuthengisa umzimba ngoba kuyinto eyehlisa isithunzi…

Umnumzana Mthandazo Sibanda yena uthi lokhu kuziphatha kwabesifazana beZimbabwe laba kutshengisa uhlupho oluqala ekhaya…

Ukuthengisa umzimba akuvunyelwa emthethweni kweleBotswana, kodwa uhulumende uyavuma ukuthi kumgceke ukuthi leli libhizimusi eliphilayo.

Umbiko kahulumende utshengise ukuthi abesifazana abanengi, abangaba yisilinganiso sokuphezu kwengxenye ekhulwini (50%) bayendile njalo bayasebenza eminye imsebenzi.
XS
SM
MD
LG