Inani labantu asebebanjwe belomkhuhlane weCOVID-19 seliqonge layafika phose amakhulu amabili kwele Botswana - 175, ilizwe leli lisithi inengi labo ngabantu bokuza, ikakhulu abatshayeli bamaloli, abagoqela abeZimbabwe abangena kulelolizwe bethwele impahla etshiyeneyo.
Umsekeli kamphathisihlalo wekhomithi ebona ngeCOVID-19 kwele Botswana, uSikwicamfundo Mosepele Mosepele, uthi abantu abafika isilinganiso phose sokungamatshumi asitshiyangalombili ekhulwini - 80%, ngabantu bokuza.
“Inani elinengi ngalabavela phandle kwelizwe, abahlolwa emngceleni. Esikubonayo yikuthi ingozi izavela phandle njalo kumele sisebenze nzima ukuthi sivikele abantu ngasikhathi sinye sivumela ukungena kwempahla.”
Abatshayeli bamaloli abavela eZimbabwe bakhala ngokugcinwa isikhathi eside emngceleni wePlumtree ngesikhathi belinde impumela yokuhlolwa kwabo iCOVID-19.
UMnu. Gideon Ndlovu, otshayela phakathi kwedolobho leGaborone lakoBulawayo, uthi ukucabanga ukungena umango kuyadondisa ngoba bahlala isikhathi eside emngceleni.
“Ungacabanga ukuthi uqeda insuku ulinde impumela yokuhlolwa iCOVID-19, sizwa sisiba lokudonda, kodwa kumele siphile. Ngabe kuleyinye indlela okungayenza ukuthi kwenziwe ngokutshetsha ngoba ungacina uwuthola umkhuhlane ulokhe ulinde impumela.”
Omunye odabuka kwele Zimbabwe ophila ngokuthenga lokuthengisa impahla phakathi kwamazwe womabili, uMnu. Rodwell Moyo, uthi uyakubona ukuhlupheka kwabatshayeli emngceleni.
“Kunzima, abanye abatshayeli bathi uma ungena kwele South Africa, uthola impumela ngesiphangiphangi. Ngapha lokhe besahlala amalanga amathathu kumbe amane. Akulamavinkili aqondileyo okudla (emngceleni). Kuyabanda, uyacina ubanjwe luphepha ulokhe ulinde impumela yakho yeCOVID-19.”
Kusenjalo, iBotswana ithi ayisoke isungule ukuhlola abantu mahlayana, idinga ukuthi umkhuhlane weCOVID-19 ubhahe okungakanani elizweni.
UMosepele uthi lokhu akuphathisi ngoba umuntu ukhona ukubanjwa yiCOVID-19 esanda kuhlolwa, okutshengisa ukuthi ukuhlola mahlayana akuniki isilinganiso esiqondileyo.
Abadabuka kwele Botswana ababanjwe belomkhuhlane lo bangamatshumi amathathu lasikhombisa (37), kukanti abalokhe belawo balitshumi lasithupha (16). Oyedwa walahlekelwa ngumphefumulo.
