amalinks wokungena

Isigodlo seMelika eZimbabwe Sinika iLupane Development Trust i$100,000


Balobelana isivumelwano semali eyethulwe yisigodlo seMelika eZimbabwe.

Umsekeli womele isigodlo seMelika eZimbabwe, uNkosazana Jennifer Savage, ngoLwesine unikeze inhlanganiso yeLupane Women’s Development Trust (LWDT) inkulungwane ezilikhulu zamadola - $100,000 - yenhlelo zokuzithuthukisa ezigoqela ukulima, ukuthunga lokufuya inkomo lokunye okufanayo.

Bekugcwele abantu eLupane Women’s Centre lapho okulotshwe khona isivumelwano sokutholiswa uncedo lwemali ngaphansi kwesikhwama seUnited States African Development Foundation.

Imali le izanceda wonke amalunga awenhlanganiso ezimele yodwa eyeLupane Women’s Development Center for Crafts and Agriculture Production.

UNkosikazi Jennifer Savage.
UNkosikazi Jennifer Savage.

Ekhuluma emkhosini lo ngemva kokubuka izilimo lezifuyo zepulazini laboMama beLupane, uNkosikazi Savage uthe kuyajabulisa ukubona abesifazana besebenza kahle bethuthukisa imuli zabo.

Uncome kakhulu lemisebenzi yezandla eyenziwa ngabantu beLupane.

UNduna Vusumuzi Prince Mabhikwa laye utshayele abesifazana beLupane ihlombe esithi imisebenzi yabo iyabukeka njalo ithuthukisa isigaba ngendlela eziphezulu.

UNkosazana Sithembiso Ncube, olilunga leLWDT, uphe ubufakazi encoma ukukhuphuka kwempilo yakhe ngokuthunga ethengisa ilala.

UNkosikazi Jennifer Savage lamalunga enhlanganiso yeLupane Development Trust.
UNkosikazi Jennifer Savage lamalunga enhlanganiso yeLupane Development Trust.

Omunye wamalunga eLWDT, uMnu. Muzobanzi Moyo osuka eJotsholo esiqintini seManganga, oqale ukuthunga ngomnyaka ka2008, uthe imuli yakhe uyiphilisa ngokuthunga esebenzisa ilala njalo sowenelisa ukuthenga lezifuyo.

UNkosazanai Simangele Dube, omunye othunga esebenzisa ilala, uthe usesenelisa ukubhadalela abantwana esikolo lokuthenga ukudla.

UNkosikazi Thenjiwe Ndlovu laye uthe uhlelo lweLWDT solwenze imuli yakhe yaphumelela ngoba sebelezifuyo ezinengi njalo sebesenelisa ukwakha izindlu zesamende.

Inhlanganiso yeLWDT eyasungulwa ngomnyaka ka1995, isilamalunga azinkulungwane ezine lengxenye. Imali abayithole lamuhla ikhangelele ukuthuthukisa imisebenzi esepulazini kunye leyelala.

Isikhwama seUSADF eZimbabwe kusukela ngo2010 sesatshala izigidi eziyisificaminwe mibili njalo isiza imisebenzi yezokulima, leyezandla eyabasakhulayo labomama abadubekayo abalenhlelo zabo endaweni ezehlukeneyo zelizwe.

Facebook Forum

XS
SM
MD
LG