amalinks wokungena

Breaking News

Madinda: Akula Kuxabana Phakathi Kwabaqeqetshi beHighlanders


Umqeqetshi weHighlanders uMadinda Ndlovu

Abaqeqetshi beqembu lenguqu eleHighlanders bathi bona babambene loba nje kulamahungahunga athi kulokudlana izithende okuthile kuleliqembu.

Iqembu le Highlanders lizadibana leleHerentals ngeSonto lidinga ukunqoba okwakuqala selokhu kuqale imidlalo yalonyaka eyesigaba se Castle Lager Premier Soccer League.

Abafana be Bosso sebedlale imidlalo eyisikhombisa njalo balemiklomelo emine ngemva kokuba ngutshiki lobhanqa emidlalweni emine, banqotshwa emidlalweni emithathu.

Lokhu kudlala kubi okwenziwa liqembu le Highlanders sekudale ukuba kube lokucabangelana okukhulu kuleliqembu njalo emavikini edluleyo kuke kwaba lenkulumo ethi kucatshangelwa ukuba iqembu libotshiwe.

Ensukwini ezisanda kwedlula kube lodaba oluphume emaphephandabeni oluthi kulemizamo eyokugenqula umqeqetshi uMadinda ngomunye wabasekeli bakhe kodwa uMadinda uthe lokhu akusilo iqiniso yikho ebuye labo abanye bakhe emhlanganweni oqhutshwa maviki wonke lapho axoxisana khona lentatheli zemidlalo.

Ekhuluma lentatheli zemidlalo omunye wabasekeli baka Madinda uBekithemba Ndlovu uthe yena udaba lolu luyamdanisa kakhulu ngoba lungamanga aluhlaza tshoko.

"Umsebenzi ka Technical Manager ngizawufuna njani yena kunguye owangilethayo ukuthi ngizofunda. Angazi ukuthi khonokho kuvela ngaphi. Kutsho ukuthi lina icareer yami liyayiphazamisa yikho ngisithi nxa ubufakazi bukhona abavezwe ukuze nxa ngilecala icareer yami ihle ime ngoba ngingumthengisi hatshi ukuthi kuthiwe ngingumthengisi kungela lutho engilwenzileyo. Ngizaqeqetsha njani iqembu lesizwe njengoba ngingumqeqetshi weqembu labaleminyaka engaphansi kwamatshumi amabili, bathini khathesi eHarare nxa besizwa udaba olunje?"

Esekhuluma phezu kwendlela iqembu le Highlanders elidlala ngayo uMadinda uthe sekuseduze ukunqoba kwalo.

Eyinye izaba lomnyaka lani lize libe lenhloni ezokukhuluma lathi ngemva komdlalo. Abafana bafuna ukucobodisa konke okucobozekayo. Silayo imizamo esesiyithethe kodwa inhloso yabadlali yikuba bazame ngakho konke okusemandleni abo ngoba labo bakhathazeke kakhulu ngalokhu okwenzakalayo.

Imidlalo yeviki lethoba minwe mbili izaqala kuqala ngoMgqibelo lapho intshantshu zanyakenye iqembu le FC Platinum elizadlala khona leqembu le ZPC Kariba ngase Mandava, iqembu le Black Rhinos lizemukela ele Hwange ngase National Sports Stadium, iqembu le Harare City lizadibana lele Triangle ngase Rufaro, iqembu le Ngezi Platinum Stars lizatshayana lele Yadah ngase Baobab kuthi iqembu le Bulawayo Chiefs lizangqikilana lele Dynamos ngase Barbourfields.

NgeSonto iqembu le Manica Diamonds lizemukela ele TelOne ngase Vengere, iqembu le Chapungu lizangqikilana lele Chicken Inn ngase Ascot kuthi iqembu le CAPS United lizadibana lele Mushowani Stars ngase National Sports Stadium.

Udaba lwemidlalo siluphiwa nguJoseph Njanji
please wait

No media source currently available

0:00 0:02:17 0:00

Facebook Forum

XS
SM
MD
LG