amalinks wokungena

Breaking News

Madinda Ndlovu: Buyani Ngobunengi Benu Emagumeni Lizosekela iBosso


UMadinda Ndlovu umqeqetshi weqembu leBosso.

Umqeqetshi weqembu leHighlanders uMadinda Ndlovu usekhuthaze abalandeli baleliqembu ukuba babuye ngobunengi babo ukuzokhuza leliqembu mhla lidlala umdlalo walo owakuqala lonyaka kusigaba sePremier Soccer League.

Imidlalo yalonyaka eyesigaba seCastle Premier Soccer League ikhangelelwe ukuqala kulimpelaviki ezayo njalo iqembu leHighlanders lihlelwe ukuba lidibane leqembu lebutho lezizwe ele Black Rhinos ngeSonto enkundleni ye Barbourfields.

Ephendula intathelizindaba zemidlalo ngemva kokubuzwa ukuba kuyini akwaziyo ngeqembu leRhinos, uMadinda uthe okuqakathekileyo yikuba yena labafana bakhe babumbe amasu awokuba bedlale njani ngeSonto ngoba bevele bengeke bebekwazi lutho ngeqembu lezivakatshi njengoba nje imidlalo iqala.

UNdlovu uthe nxa kulendingeko bazaguqula indlela abazadlala ngayo sekuphele ihlandla lakuqala lomdlalo ngoba lapho yikho abayabe sebebone khona ukuba iqembu leRhinos lidlala njani.

Lumqeqetshi uthe yena okuqakathekileyo yikuba abantu bengakhohlwa ukuba uhlelo lokuphendukisa isiko leqembu leHighlanders ngolweminyaka emithathu njalo okuqakathekileyo okwakhathesi yikuba iqembu lakhe lidlale ngendlela ebukekayo.

UNdlovu ukhuthaze abalandeli beqembu leHighlanders ukuba babuye ngobunengi babo ukuzobukela iqembu lakhe ukuze baphe abadlali amadlabuzane.

“Abalandeli bengabuya ngobunengi babo bezosekela iqembu labo kuzafana nje lokuba sesilabadlali abalitshumi lambili ngoba indlela abalandeli abakhuza ngayo abadlali yenza abadlali babe lomfutho.”

Imidlalo izaqala ngoMgibelo lapho iqembu le Chicken Inn elizemukela khona ele Dynamos enkundleni yeBarboufields, eleNichrut lizemukela ele Mutare City ngase Mandava, eleNgezi Platinum lizadlala lele Herentals ngase Baobab, ele ZPC Kariba lizadibana lele FC Platinum ngase National Sports Stadium, ele Yadah lizadlala lele Bulawayo Chiefs ngase Rufaro Bulawayo City lizangqikilana lele Chapungu ngase Luveve.

Kweminye imidlalo yangeSonto iqembu le CAPS United lizadlala lele Harare City ngase National Sports Stadium) kuthi ele Shabanie Mine lizadibana lele Triangle United ngase Mandava.

Facebook Forum

XS
SM
MD
LG