amalinks wokungena

Breaking News

Madinda Ndlovu: Sidinga Umgadli Obukhali


UMadinda Ndlovu ulolonga iqembu leHighlanders ...

Umqeqetshi weqembu le Highlanders uMadinda Ndlovu uthi iqembu leli kuzamele lidinge umgadli obukhali imidlalo yalonyaka eyesigaba se Castle Premier Soccer League ingakaqalisi.

Iqembu le Highlanders selilamaviki amahlanu lizilolonga lilungiselela ukuqala kwemidlalo yalonyaka njalo umqeqetshi walo uMadinda uthi yena labasekeli bakhe ababalisa uMandla Mpofu, uMelusi Sibanda kanye lo Tembo Chuma sebenanzelele ukuba kulendingeko eyokuba belungisise phambili kubagadli.

“Sesinanzelele ukuba kukhona lapho okumele silungisise khona. Nxa imali ingatholakala kuzamele silungisise phambili sidinge umuntu ozasihlohlela kodwa nxa imali ingekho sizasebenza labafana esilabo kuze kube phakathi laphakathi komnyaka lapho esingenelisa khona ukuthatha abanye njalo abadlali.”

Iqembu le Highlanders lehlukane labagadli ababalisa uRalph Matema kanye lo Nhlanhla Ndlovu ekupheleni kwanyakenye njalo phambilini kwalokho lithengise abagadli abambalwa eminyakeni edluleyo ababalisa uKnox Mtizwa kanye lo Prince Dube.

Abagadli abakhona khathesi ababevele bekhona lanyakenye ngababalisa uRay Lunga kanye lo Gabriel Nyoni ikanti iqembu le Bosso liphinde laqhatsha njalo uOzias Zibande owake walidlalela eminyakeni eyedluleyo.

Kusenjalo, iqembu le Highlanders seliqalile ukudlala imidlalo eyokuzwana amandla njalo namhla emini lidibane lele Talen Vision elidlala kusigaba se Southern Region Division One ikanti ngeSonto lizangqikilana lele Nichrut elase Shurugwi elingene lonyaka kusigaba sePSL.

Facebook Forum

XS
SM
MD
LG