amalinks wokungena

Breaking News

Madinda Ndlovu: Sifuna Iqembu leHighlanders Libuyele Lapho Elalikhona Kudala


Madinda Ndlovu

Umqeqetshi weqembu le Highlanders uMadinda Ndlovu uthi kumele kuvuselelwe isiko ukuze iqembu leli livuke khwatshu liqale njalo ukuphakamisa izicoco.

Ekhuluma lentathelizindaba zemidlalo okwakuqala selokhu eqhatshwe ukuba ngumqeqetshi weqembu le Highlanders, uMadinda uthe iqembu leli lilendlela yalo elaliyilandela kudala lisadla amahabula okumele ivuselelwe ukuze liphakame njalo.

“Icebo esisebenza ngalo ngelokuba iqembu leli libuyele endleleni eqondileyo ... Siphendukise imikhuba lamasiko ethu njengeqembu le Highlanders eyokwenza izinto ngendlela ethile. Sikhangelele ikusasa yeqembu yikho sizama ukuqhuba uhlelo oluzakwenza ukuba imikhuba lamasiko eqembu kugxile impande ukuze yiloba ngubani ozaqhatshwa ngemva kwami efike ehambe nganyawo lunye.”

Abalandeli beqembu le Highlanders bakhalaze kakhulu emhlanganweni oqhutshwe ekuqaleni kwanyakenye ngokuba leliqembu lisebenzise abadlali abasakhulayo abakhulele kulo hatshi ukuthenga abadlali abavela kwamanye amaqembu njalo uMadinda uvele ulendumela eyokusebenza labafana abasacathulayo.

“Ngiqhatshwe ukuba ngumqeqetshi weqembu le Highlanders ngaphiwa umlandu wokuvuselela iqembu siphendukise insuku zakudala lapho elalitshaya khona eziwayo. Akusoze kube lula kodwa kungumsebenzi wethu ukuphuma leqembu elizancintisa lenze abalandeli bebuye ngobunengi ukuzolibona enkundleni.”

UMadinda yena othathe isikhundla ebesilomqeqetshi odabuka kwele Holland uErol Akbay usebenza ndawonye lo Mandla Mpofu kanye lo Melusi Mabaleka Sibanda kuthi okhangela abafana ngu Vezigama Dlodlo.

Umqeqetshi wabonozinti akakazakali kodwa isiphathamandla seqembu kle Highlanders uNhlanhla Dube uthe uzakuba khona ngokuhamba kwesikhathi.

Iqembu le Bosso selilensuku ezimbalwa liqalise amalungiselelo alo njalo inengi labafana abakhona ngabasakhulayo ngemva kokuba lehlukane labadlali asebekhulile abagoqela uTendai Ngulube, uAllen Gahadzikwa, uEric Mudzingwa, uRalph Matema kanye lo Simon Munawa.

Facebook Forum

XS
SM
MD
LG