Ucwaningo olwenziwe yinhlanganiso ye Magamba Network luveza ukuba akula nguquko kusimo somnotho we Zimbabwe ekhangelelweyo njengoba uqhubekela phambili uwonakala, abantu makhaza bethwele nzima ukuthola imali yokuthenga impahla yokusebenzisa nsuku zonke.
Lolu cwaningo lwethulwe namhlanje eHarare ngabeMagamba Network, phansi kohlelo lokucubungula olwe Citizen Manifesto le Orange Door Research ephiwe igama lokuthi yi Citizen’s Voice Index abantu makhaza beveza ukungasuthiseki ngesimo somnotho elizweni.
Inhlanganiso lezi bezidinga ukuthola ukuthi abantu bawubona njani umumo okhona elizweni. Abantu beZimbabwe bathi kukhanya kumnyama emuva laphambili ngoba umnotho ungamanga kuhle, inkohlakalo isingumkhuhlane phakathi kwenkokheli yezombusazwe lokungaphathwa kuhle kwamadolobho.
Ucwaningo lolu olusebenzise omakhalwekhukhwini ukuthola limpumela iveza ukuthi inengi labaphathekayo bengabatsha bekhala ngendlela umumo womnotho obaphethe ngayo loba nje besithi umumo wezombusazwe usungconywana.
Kutholakale njalo ukuthi abanengi abasemhlubulweni we Mandebeleni yibo abalesilinganiso esikhulu sabangasuthiseki ngendlela umumo womnotho ophethwe ngawo libandla le ZANU PF.
uMnu Kudzai Zvinavashe obesembuthanweni lo, uthi umnotho welizwe awukagukuqki laloba nje abantu be Zimbabwe besenelisa ukukhuluma abakufunayo ikakhulu ebulenjeni be internet.
Omunye obe esembuthanweni munye nguMnu Ashley Pfunye yenake othi vele kakulamehluko phakathi kukaMongameli Emmerson Mnangagwa kowayengumongameli uRobert Mugabe.
Ocubungula ezombusazwe uMnu Leopold Munhende uvumelana lempumela yalolu cwaningo esithi kuqakathekile ukuthi ele Zimbabwe lifuna imisebenzi enje eveza sobala izifiso zabantu
IMagamba Network yazise ukuthi ucwaningo lolu luzaqhubeka lusenziwa ukuze ilizwe le Zimbabwe lazi imicabango lemibono yabantu makhaza.
