Abasakhulayo abazinkokheli abangamatshumi amane lambili sebelungiselela ukuya kwele Melika ngaphansi kohlelo lweMandela Washington Fellowship for Young African Leaders ukuyafundela ubuciko bokuqhuba amabhizimusi lemisebenzi etshiyeneyo.
Abasakhulayo laba bazaphatheka kuzifundo lezi okwamaviki ayisithupha besezikolo zemfundo yaphezulu lakumankampani atshiyeneyo.
Isikhulumeli emawofisini wommeli wakwele Melika eZimbabwe, uNkosikai Stacy Lomba, uthi abasakhulayo laba bazaxhumana labanye abavela kwamanye amazwe emakolitshini atshiyeneyo.
Umqondisi wenhlanganiso yeNational Association of Youth Organisations, uMnu. Misheck Gondo, uthi lolu luhlelo oluqakathekileyo oluzakhuphula abasakhulayo laba.
Isakhamuzi seHarare, uMnu. Jonathan Mathe, utshele lumsakazo ukuba uhlelo lolu kuyindlela enhle yokuthuthukisa abasakhulayo bamazwe akuzwekazi leAfrica ukuze bazi labo okwenzakala kwamanye amazwe afana lele Melika.
Uhlelo lolu lwasungulwa ngowayengumongameli, uMnu. Barrack Obama, owayelenjongo yokuthuthukisa abasakhulayo kuzwekazi leAfrica abakunhlangothi zobukhokheli lokuqhutshwa kwamabhizimisi.
