amalinks wokungena

Breaking News

Manengi Amankampani eBotswana Angekho Emthethweni Athumeza Imali Kazulu eZimbabwe


Asemanengi amankampani eBotswana angekho emthethweni athumezela imali eZimbabwe.
Asemanengi amankampani eBotswana angekho emthethweni athumezela imali eZimbabwe.

Ngesikhathi iZimbabwe ibhekane lokuswelakala kwemali, abamabhizimusi eBotswana sebethole ithuba lokuqala amabhizimusi okuthumela imali eZimbabwe.

Lokhu sokudale njalo ukuthi kusungulwe amanye amabhizimusi ngabe Zimbabwe awokuthumela imali kodwa angabhaliswanga okusemthethweni.

Kungakaqali udubo lokuswelakala kwemali eZimbabwe ngomnyaka ka2008, bekulamakampani amalutshwane eBotswana akubhizimusi lokuthumela imali phandle kwelizwe.

Inengi belisebenzisa amabhanga kumbe amakampani ajwayelekileyo afana labo Western Union kanye labo Money Gram.

Kodwa ngenxa yesimo somnotho esiqhubeka sigugudeka eZimbabwe, abanye sebebone ithuba elihle lokuqala amabhizimusi okuthumela imali phandle kwelizwe, ikakhulu kulabe Zimbabwe emngqondweni.

Sokuvumbuluke amakampani afana laboMukuru, iEco Cash, World Remit kanye labanye abangabhalisanga okusemthethweni, abahlawulisa ukuthumela imali ekhaya.

uMnu. Elias Ndlovu, ohlawulisa abantu ukuthumela ekhaya kodwa engabhalisanga ibhizimusi yakhe okusemthethweni, uthi wabona kulithuba elihle lokuqala ibhizimusi.

"Ngesikhathi esifana lalesi abakhaliphileyo bayavula amabhizimusi, yisikhathi esihle kakhulu sokuvula leli bhizimusi.”

Kukanti uMandlaenkosi Dube uthi ngesimo somnotho esifana lokwenzakala eZimbabwe, abanye abangaphandle yibo abacina bethola amathuba amahle okuphumelela.

"Umumo okhona ekhaya usuvulele amakampani wokuthumela imali phandle kwelizwe amathuba ngoba nanku sibona amakampani esegcwele indawo yonke. Abanye uma bekhala (ngesimo somnotho) bona bayajabula ngoba kuyabahambela."

UNkosazana Edith Banda uthi ngokuswelakala kwemali emabhanga, sebebanjwa ngamandla ukuthi bethumele imali ngamakampani akubhizimusi yokuthumela imali phandle kwelizwe.

"Imali eZimbabwe ayitholakali, abalezihlobo phandle kwelizwe yizo esizinceda ngokuthumela imali ngamakampani afana labo Mukuru, Western Union kanye le EcoCash.

Kodwa noma nje idolobho leGaborone kanye lamanye amancane endaweni zonke eBotswana, eqhubeka esiba lamabhizimusi amanengi awokuthumela imali phandle kwelizwe, kulokungahlaliseki ngokwenzakala eZimbabwe.

Esinye isisebenzi kweyinye yamakampani amakhulu akubhizimusi yokuthumela imali phandle kwelizwe, sitshele iStudio 7 ukuthi abasathembisi abafuna uncedo ukuthi bazathola imali khonapho khonapho uma beyithumela eZimbabwe.

Lokhu kudalwa yikusilela kwemali elizweni jikelele.Uhulumende weZimbabwe usemise ukunikeza abantu imali esithi amakampani yiwo azaqala ukuthola usizo, njalo imali ayisavunyelwa ukuphumela phandle kwelizwe.

IZimbabwe, ngesikhathi ilwisana lobunzima bomnotho, iphila ngakwesinye isandla, ngemali ethunyelwa yizizalwane ezisebenza phandle kwelizwe, eyaziwa ngesilungu ngokuthi ngama Diaspora Remittances.

Imali ethunyelwa ivela phandle kwelizwe yaphose yafika amabhiliyoni amabili amadola eMelika nyakenye kuphela.

XS
SM
MD
LG