amalinks wokungena

UTsvangirai Wehluleka Ukuya Emhlanganweni weMDC-T


UMnu. Morgan Tsvangirai lomkakhe, uNkosikazi Elizabeth Tsvangirai.

Umkhokheli webandla le MDC-T, uMnu. Morgan Tsvangirai, wehlulekile ukuya emhlanganweni edolobheni leGwanda ngeSonto lapho obekhangelelwe ukukhulumisana lenkokheli yalelibandla eyezansi yeMaNdebeleni.

Lokhu kwenzakala kulokufuthelana phakathi kwalelibandla ngodaba lomanyano wamabandla aphikisayo oweMDC Alliance.

Lokhu kudale ukuba abanye babhale amaphetshana bawaphosela emahofisini aweMDC-T eGwanda besola inyathelo likaTsvangirai lokungena kulumanyano bengaqalanga bakhulumisana phakathi kwebandla besithi bona basekela uNkosazana Thokozani Khuphe osola kakhulu umanyano we MDC Alliance.

UTsvangirai ubekhangelelwe ukuya eGwanda kodwa kasenelisanga ukufika ngoba kuthiwa ebengezwa kuhle.

Isikhulumi salelibandla ezansi yeMaNdebeleni, uMnumzana Mthokozisi Bhebhe, utshele iStudio 7 ukuthi laloba uTsvangirai engesenelisanga ukubuya kulumhlangano, uqhutshwe kakuhle.

Kungenani lokungazwanani okubikwa sekukhona phakathi kwakhe lomsekeli wakhe uNkozasazana Thokozani Khuphe, uBhebhe uthe loludaba abazange bakhuluma ngalo ngoba bengalwazi.

“Loludaba aluzange lukhulunywe ngalo lathi siluzwa nje abantu bekhuluma ngalo thina esiphakathi kwalinhlanganiso asazi lutho ngalo. Into ebikhona yikuthi lumhlangano bekumele kubekhona umongameli webandla obekhangelelwe ukwethulela uzulu alakho kodwa ngezizatho ezithize kasayenelisanga ukubuya kodwa abakade ebathumile bafikile bazochasisa udaba lwe Alliance.

“Babuye baphindisela bachasisa njengalokhu okwatshiwo ngabantu ekuqaliseni, kwachasiswa lokuthi abantu bazayabelwa njani izigaba, yikho okuchasiswe ngubaba uMorgan Komitshi unational vice chairman obenguye othunywe ngupresident.”

Loba nje uBhebhe esithi konke kukahle kubandla lakhe ngeSonto ekuseni kuvuke kulamaphetshana emahofisini la acatshangelwa ukuthi abhalwa ngabasekeli bakaMaKhuphe.

Abebhalwe ukuthi ‘Mat South asifuni bumbulu – Khuphe is right no MDC Alliance selfish Morgan’.

Kodwa uBhebhe uthi kuvamile kwezombusazwe ukuthi izitha zisebenzise amathuba anje ukuletha ingxabano phakathi kwebandla.

“Lokhu kujayelekile kwezombusazwe kulelilizwe ngoba hanti zikhona izitha zethu ikakhulu abacuphi laba labogciwo abamele ibandla leZanu PF bangakwenza lokhu inqe yisiphi isikhathi bezama ukuthi baphambanise uhlelo kodwa ngibona engani kibo lanxa bekukhangele kuliphutha ngoba umhlangano uvele ungowamastructure ngeke uphanjaniswe ngamaflier.

“Lokhu ungakwenza eralini kazulu kodwa abantu abakustructure senhlanganiso abalezikhundla abakuma organs eparty atshiyeneyo bayakwazi ukuthi kukjulunyiswana njani.”

Loba nje inengi labasekeli beMDC-T ezansi yeMaNdebeleni libikwa lingathokozi ngendlela okwabelwane ngayo izihlalo zephalamende phansi komanyano wamabandla aphikisayo, uBhebhe uthi okwakhathesi kusaxoxiswana ngaloludaba.

“I-negotiations zokuthi kuyamiwa njani ukuthi amabandla abelane njani ama-constituency yinto elokhu isalungiswa njengoba into ze Alliance zilokhu zikhulunywa lokhu kusiya phambili kuluhlelo akukafiki ekuphutsheni njengoba sikhuluma sinje sikhuluma ngamabandla la akhona ayi-seven angavuka sengu eight ukuthi kuyaphetha kumi njani akusizo sinto esingakhuluma ngazo lamhlanje.”

Abasekela uMaKhuphe bona bathi akaphathwanga kahle.

UNkosazana Khuphe kahambanga emhlanganweni oqhutshwe ngumanyano wamabandla aphikisayo ngoMgqibelo koBulawayo njalo abacubungula ngezombusazwe bathi lelibandla lilakho ukudabuka phakathi.

Facebook Forum

XS
SM
MD
LG